Bilim jáne ǵylym ministri Ashat Aimaǵambetov Joǵary oqý oryndarynyń oqytýshylarynyń ailyǵyn arttyrý joldaryn atady, dep habarlaidy "Ult aqparat".
Bilim jáne ǵylym ministrliginiń apparattyq otyrysynda baiandama jasaǵan vitse-ministr Miras Dáýlenov qazirgi ýaqytta 30 JOO-da oqytýshylardyń ailyǵy 30 paiyzǵa kóterilgenin jetkizdi. Dese de olardyń ortasha jalaqysy tómen kúide qalyp otyr.
«Mektep muǵalimderiniń ailyǵynan JOO oqytýshylardyń jalaqysy az. Osyǵan bailanysty JOO oqytýshylary mektepke ketip jatyr. Mundai tendentsiianyń kúsheiip bara jatqanyn da baiqaýǵa bolady. Sol sebepti memlekettik JOO-larda granttardyń sanyn arttyrý kózdelýde», - dedi ol.
Bul máselege qatysty Bilim jáne ǵylym ministri Ashat Aimaǵambetov Qazaqstandaǵy JOO oqytýshylarynyń jalaqysy óte tómen bolyp turǵanyn jetkizdi.
«Memlekettik bilim berý jáne ǵylymdy damytý baǵdarlamasy sheńberinde biyl granttardyń quny birneshe ese ósedi. Bul qandai nátije beredi? Birinshiden, bizdiń oqytýshylardyń jalaqysyn arttyrýǵa múmkindik beredi. Ǵylym salasynda da qarjylandyrý birneshe ese ósip jatyr. Sondyqtan osy ózgeristiń bári óziniń septigin tigizýi tiis. Jalaqy máselesi boiynsha tiisti jumys júrgizý kerek. Birinshiden bizdiń ýniversitetter (memlekettik ýniversitetter boiynsha) tiimsiz shyǵyndardy qaita qaraýy tiis. Ártúrli tiimsiz forýmdardy, sharalardy qysqartý kerek. Prezident qańtar aiynda Úkimettiń keńeitilgen otyrysynda osyndai tapsyrma bergen bolatyn. Ol tek ministrliktiń apparatyna qatysty emes, ol kvazimemlekettik mekemelerge de qatysty másele», - dedi ministr.
