Bilim jáne ǵylym ministri Ashat Aimaǵambetov mektep oqýshylaryn úshinshi toqsanda oqytý tártibine qatysty Vedomstvoaralyq komissiia sheshimin túsindirdi, dep habarlaidy QazAqparat.
Eske sala ketsek, buǵan deiin ministr úshinshi toqsannan bastap UBT jáne memlekettik emtihan tapsyratyn pánder dástúrli formatta oqytylatynyn málim etken bolatyn.
«Ásirese UBT jáne memlekettik emtihan tapsyratyn pánder, sonymen qatar qiyndyq týdyryp otyrǵan pánder de dástúrli formatta oqytylady. Sondyqtan bul másele boiynsha sabaq kestesine deiin ádistemelik usynymdardy daiyndap, búgin jiberemiz. Úshinshi toqsannan bastap talqylanǵan tártip boiynsha jumys júrgizemiz», - degen edi Ashat Aimaǵambetov Bilim jáne ǵylym ministrliginiń apparat otyrysynda.
Búgingi baspasóz máslihatynda ministr bul óte mańyzdy sheshim ekenin aityp ótti.
«Bul oqý tártibi memlekettik emtihan tapsyratyn balalarǵa da qatysty. Mektep túlekteri jaily aityp otyrmyn. Olarǵa bilim alýdyń mańyzy óte zor. Sol sebepti biz oqýshylardyń 70 paiyzy dástúrli formatta, al 30 paiyzy qashyqtan oqitynyn aityp otyrmyz. Ásirese Ulttyq biryńǵai testileýge bailanysty pánder dástúrli formatta oqytylady. Qalǵanyn qashyqtan oqytamyz», - dedi ministr.
Ol sonymen qatar bul rette sanitarlyq talaptar qalai saqtalatynyn aityp ótti.
«Bir kabinet bolady. Qońyraý ártúrli ýaqytta soǵylady. Áleýmettik qashyqtyq saqtalady. Buǵan deiingi sanitarlyq talaptar kúshinde qalady. Ózgeris joq. Biz Bilim jáne ǵylym ministrligi retinde balalardyń dástúrli formatta oqýyn qalaimyz. Alaida basqa memlekettik organdardyń quzyretine jatatyn sanitarlyq normalar taǵy bar», - deidi ministr.
