Qazaqstanda pedagogterdiń eńbegin normalaý júiesi engiziledi. Atalǵan qujatty búgin Úkimet otyrysynda QR Bilim jáne ǵylym ministri Ashat Aimaǵambetov tanystyrdy, dep habarlaidy QazAqparat.
«Biz jobada pedagogterdiń mártebesin birinshi orynǵa qoiyp otyrmyz. Memleket basshysynyń tapsyrmasyna sai 4 jyl ishinde 500 myń pedagogtiń ebekaqysyn 2 esege ulǵaitý qarastyrylǵan. Muǵalimderdi qaita daiarlaý, biliktilikti arttyrýdyń jańa júiesi engiziletin bolady. Munan bylai balabaqsha, qosymsha bilim jáne kolledj pedagogteri, olardyń basshylary attestattaýdan ótip, jalaqysy artatyn bolady. Pedagogterdiń eńbegin normalaý júiesin engizemiz jáne 2021 jyldan bastap ýniversitetterdiń túlekteri retteletin mamandyqtar boiynsha sertifikattaýdan ótetin bolady», - dedi 2025 jylǵa deiin Qazaqstanda bilim men ǵylymdy damytýdyń memlekettik baǵdarlamasyn tanystyrǵan ministr.
Sonymen qatar onyń aitýynsha, pedagogikalyq bilimdi jańǵyrtý, bolashaq muǵalimderdiń pedagogikalyq praktikasyn ózgertý jáne ony ulǵaitý, oqý baǵdarlamalaryn jalpy 100 paiyzǵa jańartý qarastyrylǵan. 3-6 jastaǵy balalardy balabaqshamen 100 paiyz qamtý josparlanǵan.
«Sapany arttyrý maqsatynda olardy litsenziialaýdy kezeńdep qaitarý jáne balalardy mektepke daiarlaýdy jaqsartý úshin jańa baǵdarlamalar engizý kózdelgen. Biz búgin kúnde kórip otyrmyz, jekemenshik balabaqshalarda ártúrli keleńsiz jaǵdailar kóbeiip ketti. Sondyqtan kezeń-kezeńmen litsenziialaý máselesin de qolǵa alǵan jón dep uiǵardyq. Óńirlerdiń jekemenshik balabaqshalarynyń usynysy boiynsha memlekettik tapsyrys quny 30 myń teńgege deiin jetkiziledi. Ol úshin respýblikalyq biýdjetten 400 mlrd teńgeden astam qarjy qarastyrylyp otyr», - dedi ol.
