QR Bilim jáne ǵylym ministri Ashat Aimaǵambetov áleýmettik jelide taraǵan kókshetaýlyq muǵalimniń daýly suhbaty jóninde pikir bildirdi, dep habarlaidy "Ult aqparat".
«Dostar! Sońǵy kúnderi tarih pániniń muǵalimi A.K.Ahetovanyń videosuhbaty keńinen taralyp jatyr. Atalǵan rolikte kóterilgen máseleler qoǵam tarapynan qyzý talqylanýda. Dál qazir bul materialdyń mazmunyna qatysty eshqandai baǵa bermeimin. Eń bastysy, kez kelgen muǵalim men ata-ana óz pikirin ashyq bildirýge quqyly ekenin túsiný - mańyzdy, al bizdiń mindetimiz - osy usynystar men eskertýlerdi nazarǵa alý», - dep jazdy ministr Feisbýk jelisindegi resmi paraqshasynda.
Ministr Memleket basshysynyń barlyq usynystardy muqiiat zerdeleý týraly tapsyrmasyn eske saldy.
«Osy baǵyttaǵy jumysymyzdy jalǵastyramyz. Senbi kúni áriptesimizben kezdesip, osy máselelerdi talqylaimyz», - dep jazdy A. Aimaǵambetov.
Aita keteiik, tarih pániniń muǵalimi, kókshetaýlyq Áliia Ahetovanyń suhbaty YouTube jelisinde 3 qazanda jariialandy. Óz suhbatynda muǵalim jańartylǵan oqý baǵdarlamasyn, baǵalaý júiesin jáne sybailas jemqorlyqpen kúres jumystaryn synǵa alǵan.
