Elordadaǵy «Qazaqstan» ortalyq kontsert zalynda «Úzdik pedagog» respýblikalyq baiqaýynyń jeńimpazdaryn marapattaý rásimi ótip jatyr. Shara barysynda elimizdiń Bilim jáne ǵylym ministri Ashat Aimaǵambetov muǵalimderdi merekelerimen quttyqtady, dep habarlaidy QazAqparat.
«Elbasymyz Nursultan Nazarbaev egemendik alǵannan bastap, bilim, ǵylym salasyna erekshe kóńil bólýde. Ony ózderińiz de jaqsy bilesizder. Elbasymyzdyń saliqaly saiasatynyń arqasynda jalpy memleketimiz, bilim salasy biikterden kórinip, jetistikterge qol jetkizýde. Qazir osy jumys jalǵasýda. Memleket basshysy Qasym-Jomart Toqaev óziniń sailaýaldy baǵdarlamasynda bilim, ǵylym salasyn damytýǵa úlken nazar aýdaryp, bizdiń aldymyzǵa naqty maqsat-mindet qoidy. Biylǵy jyly Tamyz konferentsiiasynada Memleket basshysy ózi qatysyp, ustazdarǵa alǵysyn bildirdi. 4 jyldyń ishinde ustazdardyń jalaqysyn 2 ese kóterý, bilim salasyn damytý boiynsha úlken maqsat júktedi. Osy baǵytta jumys istep jatyrmyz», - dedi ol.
Ministr Pedagogtardyń mártebesi týraly zańnyń ázirlenip, qazirgi ýaqytta atalǵan qujattyń Parlament qabyrǵasynda qaralyp jatqandyǵyn atap ótti.
«Osy zańdy iske asyrý úshin biýdjetten de qomaqty qarajat qarastyrylyp otyr. Búgingi kúnniń ózinde 3 trillionnan astam qarajat qaraldy. Bul bizdiń ustazdarǵa, jalpy bilim salasyna degen úlken qurmet. Árine, problemalar joq emes, bar. Biz onyń barlyǵyn bilemiz. Ony muǵalimdermen, ata-analarmen, qoǵammen birge sheshemiz. Uly ustaz, aǵartýshy Ahmet Baitursynov: «Maǵan bárinen de ustaz, muǵalim jaqyn. Muǵalim mekteptiń júregi» degenin bilesizder. Sondyqtan muǵalimderge qansha madaqtama aityp, qanshama jaqsylyq jasasaq ta kóp bolmaidy. Sebebi muǵalimderdiń jumysy óte mańyzdy. Memleketimizdi, bolashaǵymyzdy jarqyn etý jolynda eń aldyńǵy qatarda turǵan mamandyqtardyń biri ekenin bilemiz», - dedi Ashat Aimaǵambetov.
