Muǵalimder jalaqyny ýaqtyly alýy kerek. Bilim jáne ǵylym ministrliginiń apparattyq otyrysynda ministr Ashat Aimaǵambetov oblystyq bilim basqarmalaryna osyndai tapsyrma berdi, dep habarlaidy QazAqparat.
Otyrys barysynda ministr óziniń orynbasary Bibigúl Asylovadan muǵalimderdiń ailyǵy boiynsha qandai da bir qiyndyq týyndap jatqany týraly surady.
«Oblystyq jáne qalalyq bilim basqarmalarynyń resmi málimetterine sáikes, jergilikti biýdjetten jáne aqpan aiyndaǵy qarjylandyrýdy kútkennen keiin barlyq muǵalimge ailyqtary tólenip jatyr. Alaida bizdiń jobany ázirleýshilerimiz «Kalkýliator» atty chat ázirlegen edi. Sonda keibir aimaqtaǵy muǵalimder aqshanyń tólenbei jatqanyn aityp shaǵymdanýda. Keibir mekteptegi esepshilerdiń durys eseptemeýinen úlken shaǵymdar túsip jatyr. Sol sebepti aimaq basshylarynyń jaýapty orynbasarlarynan árkimniń óz aimaǵyndaǵy ahýaldy baqylap otyrýyn suradym. Óitkeni, myń jarymǵa tarta ótinim kelip túsken. Ózim de olarǵa jaýap berip jatyrmyn. Alaida fizikalyq turǵyda olardyń bárine jaýap bere almai jatyrmyz. Muǵalimder ailyqtarynyń durys eseptelip berilmei jatqanyna shaǵymdanýda», - dedi Bibigúl Asylova Bilim jáne ǵylym ministrliginiń apparattyq otyrysynda.
Óz kezeginde Ashat Aimaǵambetov bul baǵytta tiisti vebinar ótkizilýi kerektigin aityp ótti.
«Tiisti tapsyrma beremin. Arnaiy vebinar ótkizip, sol boiynsha tiisti tehnologiiany qoldana otyryp, barlyq ekonomister men býhgalterlerge búkil aqparatty berý kerek. Óitkeni búgingi tańda túsinbeýshilik óte kóp. Mysaly oblystyq bilim basqarmalary bir, basqasy ekinshi aqparatty aitady. Jergilikti mektepke kelgende muǵalimderge ailyǵyn qalai tóleitinimizdi túsinbei jatyr. Biraq bizde normativti qujatta – 11.93-shi qaýlyda bári jazylyp tur. Ol jerde kúrdeli eshteńe joq. Koefitsentti jazyp qoidyq – endi sony kóbeitip, sanaý kerek. «Kalkýliator» chatyn onlain-rejimde qostyq. Sodan da qarap otyrýǵa bolady», - dedi Bilim ministri.
Ministrdiń aitýynsha, jalaqyny muǵalimder ýaqtyly alýy kerek.
Eske sala ketsek, 2020 jyldyń 1 qańtarynan bastap elimizdegi muǵalimderdiń jalaqysy 25 paiyzǵa kóterilgen edi.
