2025 jylǵa qarai shaǵyn qalalarda, aýdan ortalyqtarynda jáne aýyldarda 5000 mektep jańǵyrtylady. Bul týraly Úkimet otyrysynda «BILIMDI ŪLT» barshaǵa arnalǵan sapaly bilim» ulttyq jobasyn tanystyrý kezinde Bilim jáne ǵylym ministri Ashat Aimaǵambetov málim etti, dep habarlaidy QazAqparat.
«Mektepterdi jaily, qaýipsiz jáne zamanaýi bilim berý ortasymen qamtamasyz etýge toqtalsaq, oqýshy oryndarynyń tapshylyǵyn joiý úshin 2025 jylǵa qarai 1000 mekteptiń qurylysy josparlanýda. Nátijesinde, úsh aýysymdy mektepterdi tolyǵymen joiý kútilýde. 2025 jylǵa qarai shaǵyn qalalarda, aýdan ortalyqtarynda jáne aýyldarda 5000 mektep jańǵyrtylady. Onyń aiasynda balalarǵa qaýipsiz jáne qolaily jaǵdai jasaý, joǵary jyldamdyqty internetpen qamtamasyz etý, mektep jihazyn jańartý, mektep kitaphanalaryn jáne ashanalardy jańǵyrtý, kúrdeli jáne aǵymdaǵy jóndeý jumystary júrgiziledi»,- dedi A.Aimaǵambetov.
Onyń aitýynsha, mektepterdiń 90%-y pándik kabinettermen jáne 100%-y qaýipsiz kirý, kúzet jáne baqylaý júiesimen qamtamasyz etiledi.
«Inkliýzivti ortada balalardy psihologiialyq-pedagogikalyq qoldaýmen qamtamasyz etý úshin erekshe qajettilikteri bar balalarǵa arnalǵan uiymdardyń jumys isteý normativin 50 myń balaǵa bir osyndai ortalyq esebinen jańartý boiynsha jumys júrgiziletin bolady. Onyń nátijesinde mundai 43 ortalyq ashylady. Budan basqa, erekshe balalardy arnaiy psihologiialyq-pedagogikalyq qoldaýǵa memlekettik bilim berý tapsyrysy ornalastyrylatyn bolady», - dedi ministr.
