Bilim jáne ǵylym ministri Ashat Aimaǵambetov mektepke deiingi, orta jáne tehnikalyq, kásiptik bilim berý uiymdarynda memlekettik tildiń qoldanys aiasyn keńeitý isine basymdyq berýdi tapsyrdy, dep habarlaidy QazAqparat.
«Jalpy memlekettik tildiń aiasyn keńeitý – bárimizdiń paryzymyz. Ol sózsiz, túsinikti másele dep oilaimyn. Elbasynyń memlekettik tildi damytý saiasatyna sáikes, bilim salasynda biraz jaqsy ózgeristerge qol jetkizdik. Qazirgi ýaqytta Memleket basshysy memlekettik tildi bilim berý salasynda damytý boiynsha bizge tapsyrma bergen bolatyn. Árine, bilim salasynda tiisti ózgerister bolmasa qazaq tilin ultaralyq tilge ainaldyrý qiynǵa ainalady. Sondyqtan kelesi jyly Til komitetiniń Bilim jáne ǵylym ministrligine berilip jatqany bekerden beker emes. Munyń bári júieli túrde osy saiasatty júzege asyrý úshin jasalyp otyrǵan qadamdar», - dedi Ashat Aimaǵambetov Bilim jáne ǵylym ministrliginiń apparat otyrysynda.
Ministr qazaq tilin ultaralyq tilge ainaldyrý máselesi kelesi jyldyń basty sharýalarynyń biri bolatynyn atap ótti.
«Qazaq tili men qazaq ádebieti páni boiynsha baǵdarlamalardy jetildirý usynystaryn qoldaimyz. Ýniversitetterde qazaq tili pániniń muǵalimderin qalai daiarlap jatyrmyz degen másele boiynsha da ózgertetin sharýalar bar. Rektorlar ony biledi. Biliktilikti arttyrý kýrstarynyń mazmunyn ózgertý máselesi de bar. Ádisteme, oqýlyqtar boiynsha bir sózben aitqanda, júieli ózgerister kerek. Biraq onyń bárine ǵalymdar, ádiskerler atsalysýy qajet», - dedi ol.
A.Aimaǵambetov negizgi másele – mektepte, balabaqshada qazaq tiliniń qoldanys aiasyn keńeitý ekenin jetkizdi.
«Orys tilde oqityn balalar bar. Olar qazaq tilin 11 jyl oqyp shyqqanymen, qazaq tilin meńgerý deńgeiin kórip otyrmyz. Saǵat sany boiynsha qaraityn bolsaq, qazaq tilinde jáne orys tilinde qazaq tili pánin oqytý saǵattary teń. Biraq sapa boiynsha suraqtar bar. Ony jasyrýǵa bolmaidy. Sondyqtan tiisti jumysty atqarmasaq bolmaidy», - dedi ol.
