Qashyqtan oqytý kezindegi bilim sapasy kemshilikteriniń ornyn toltyrý úshin keshendi jumys júrgiziledi. Bul týraly búgin Úkimet otyrysynda QR Bilim jáne ǵylym ministri Ashat Aimaǵambetov aitty, dep habarlaidy QazAqparat.
«Taǵy bir mańyzdy baǵyt – oqý protsesin beiimdeý. Biz jańa oqý jylyn dástúrli formatta bastaǵanmen qashyqtan oqytý kezindegi bilim sapasy kemshilikteriniń ornyn toltyrý úshin keshendi jumys júrgizýimiz qajet. Osy maqsatta keshendi, júieli is-sharalardy júzege asyratyn bolamyz. Halyqaralyq tájiribede júrgizilgen qashyqtan oqytýdyń nátijesi de zertteldi. Soǵan sáikes oqý jylynda negizgi pánder boiynsha byltyrǵy qiyn taqyryptarǵa kóbirek saǵat bólinip, oqý baǵdarlamalaryn túzetýge, nashar úlgeretin balalarmen qosymsha jumysqa basa nazar aýdarylady», - dedi Ashat Aimaǵambetov.
Onyń atap ótýinshe, pedagogtarǵa tsifrlyq quzirettilikterin arttyrý úshin onlain kýrstar daiyndaldy. 2 tamyzdan bastap muǵalimder kýrstan óte bastady.
«Sabaqtyń uzaqtyǵy 45 minýt bolyp, kúndelikti baǵalaý júiesi ári qarai jalǵasady. Biyl 25 mamyrdan 19 maýsymǵa deiin uiymdastyrylǵan jazǵy mektep tájiribesi negizinde kelesi oqý jylynda da 4 aptalyq jazǵy mektep uiymdastyrý boiynsha sheshim qabyldandy», - dedi ministr.
