Bilim jáne ǵylym ministri Ashat Aimaǵambetov ǵylym salasyndaǵy normativtik-quqyqtyq aktilerge engizilgen ózgerister týraly málimdedi, dep habarlaidy Sputnik Qazaqstan.
Ministrdiń aitýynsha, qazannyń sońynda úkimet qaýlysymen úsh negizgi normativtik-quqyqtyq aktige ózgerister engizildi. Olardyń qatarynda Ulttyq ǵylymi keńester týraly ereje, memlekettik ǵylymi-tehnikalyq saraptamany uiymdastyrý jáne júrgizý qaǵidalary jáne bazalyq, granttyq, baǵdarlamalyq-nysanaly qarjylandyrý qaǵidalary bar.
"Endi 12 aidan astam merzimge granttyq qarjylandyrý alatyn jobalar boiynsha aralyq esepter tapsyrýdyń qajeti joq. Memlekettik standarttyń biýrokratiialyq normalary boiynsha birneshe ret engiziletin túzetýlerdi eskerip, buryn-sońdy joba jetekshilerine jyl saiyn qazan-qarasha ailarynda granttyq qarjylandyrý boiynsha aralyq esepterdi tapsyrý úshin tórt apta qajet bolatyn. Endigi kezekte 40 betten turatyn esep jazyp, tapsyrmai-aq joba týraly qysqasha málimeti bar saýalnamany toltyrýǵa jarty saǵat jetkilikti", - dep jazdy Aimaǵambetov Facebook paraqshasynda.
Sondai-aq konkýrstyq rásimderdi ótkizý merzimi 145 jumys kúninen 92-ge deiin qysqartyldy.
Habarlandyrý shyqqannan bastap sheshim qabyldaýǵa deiingi aralyq qosa esepteledi.
Konkýrstyq ótinimderge qosymshalardyń sany 12-den 5-ke deiin azaityldy. Endigi kezekte qosymshalardyń sanyn birge deiin qysqartý josparlanǵan.
Eger ótinim bergen kezde fors-major bolsa, onda úsh kúnniń ishinde barlyǵyn derlik ózgertýge bolady.
Ulttyq ǵylymi keńes qurylady
Ministrdiń sózinshe, ǵylymi jáne ǵylymi-tehnikalyq qyzmet nátijelerin kommertsiialandyrý boiynsha jeke Ulttyq ǵylymi keńes qurylady. Onyń quramyna negizinen ekonomikanyń naqty sektory men venchýrlik biznestiń ókilderi, marketologtar, táýekel-menedjerler, iri investitsiialyq jobalardyń qatysýshylary, qarjy sarapshylary kiredi.
"Ulttyq ǵylymi keńes músheleriniń Ádep kodeksi bekitildi. Ony buzý keńesten shyǵaryp jiberýge negiz bolady", - dedi ministr.
Ulttyq ǵylymi keńes quramyndaǵy ǵalymdardyń sany kóp bolady, iaǵni 50%-ten astamy ǵalymdardan quralady. Buryn ereje boiynsha Ulttyq ǵylymi keńes quramynda memlekettik organdar men qoǵamdyq birlestikterdiń ókilderi kóp bolǵan.
"Ǵalymdarǵa eleýli qarjylyq erkindik berilip otyr. Osylaisha, jobaǵa bólingen qarajat únemdelgen jáne (nemese) paidalanylmai qalǵan jaǵdaida ǵylymi jetekshi ony jalaqyǵa, ózge de qyzmetter men jumystarǵa, materialdar men jabdyq satyp alýǵa, jalǵa alýǵa, tehnikany paidalaný shyǵystaryna derbes qaita bólýge quqyly. Buǵan deiin ǵalymdar árbir usaq-túiek úshin Ulttyq ǵylymi keńeske júginýge májbúr bolatyn", - dedi ol.
Atalǵan mańyzdy túzetýler toptamasy qabyldanyp, kúshine ene bastady.
"Ǵylym komitetine protsesterdiń basym bóligin elektrondyq formatqa kóshirý jáne barlyq protsess pen memlekettik qyzmetterdiń tolyq reinjiniringin júrgizý tapsyryldy. Sondai-aq rásimder merzimin azaitýǵa baǵyttalǵan taǵy bir ózgeris toptamasyn ázirlenip, engiziledi", - dedi bilim jáne ǵylym ministri.
Aita keteri, memleket basshysy jyldyń sońyna deiin "Ǵylym týraly" zańnamaǵa ózgerister engizýdi tapsyrǵan. Onyń ishinde ǵalymdardyń jalaqysyn bazalyq qarjylandyrýǵa qosý, irgeli zertteýlermen ainalysatyn ǵylymi institýttardy tikelei qarjylandyrý tetigin engizý, ǵylymi zertteýlerdi qarjylandyrý merzimin bes jylǵa deiin uzartý, Ulttyq ǵylymi keńester sheshimderi boiynsha apelliatsiia institýtyn qurý tapsyryldy.
