Barlyq balabaqshalarda balany damytýdyń jańa modeli engiziledi. Bul týraly Úkimet otyrysynda «BILIMDI ŪLT» barshaǵa arnalǵan sapaly bilim» ulttyq jobasyn tanystyrý kezinde Bilim jáne ǵylym ministri Ashat Aimaǵambetov málim etti, dep habarlaidy QazAqparat.
«Memleket basshysynyń tapsyrmasyna sáikes, «BILIMDI ŪLT» barshaǵa arnalǵan sapaly bilim» ulttyq jobasy ázirlendi. Joba qoǵam ókilderimen, bilim salasynyń sarapshylarymen keńinen talqylandy, múddeli memlekettik organdarmen pysyqtaldy. Ulttyq joba - 2025 jylǵa deiingi Ulttyq damý josparyndaǵy, Qazaqstan-2050 Strategiiasy, Memleket basshysynyń jáne Nur Otan partiiasynyń sailaýaldy baǵdarlamasynda belgilengen negizgi mindetterdi qamtydy. Jalpy ol 4 baǵyt, 5 mindet, 15 kórsetkish jáne 26 is-sharadan turady», - dedi Aimaǵambetov.
Birinshi mindet - balabaqshalardyń qoljetimdiligin jáne sapasyn qamtamasyz etý. Ol úshin mektepke deiingi uiymdardyń jelisi damytylyp, memlekettik tapsyrys vaýcherlik qarjylandyrý arqyly ornalastylady. Sonymen birge, Memleket basshysynyń tapsyrmasy aiasynda barlyq balabaqshada balany damytýdyń jańa modeli engiziledi. Bul óte mańyzdy.
«Sonyń ishinde balabaqshalardyń memlekettik bilim berý standarty «Oiyn arqyly oqytý» printsipi boiynsha ózgertiledi. Osyǵan orai, balalardy erte jastan damytý boiynsha pedagogtarǵa biliktilikti arttyrý kýrstary uiymdastyrylytyn bolady. Nátijesinde, 2025 jylǵa qarai 2-6 jastaǵy balalardy qamtý 95%-ǵa jetedi, al 3-6 jasta qamtý 100% bolady», - dedi ministr.
