Kann kinofestivalinde júlde alǵan «Aika» filminiń Qazaqstan atynan Oskarǵa qatysatyn múmkindigi bar. Bul týraly QR Mádeniet jáne sport vitse-ministri Aqtoty Raiymqulova málimdedi, dep habarlaidy QazAqparat.
Búgin QR Mádeniet jəne sport ministri Arystanbek Muhamediuly Qazaqstan tarapynan Oskar syilyǵyna usynylǵan «Aika» filminiń ótpei qalǵanyn aitqan edi. Ministrdiń atap ótýinshe, kórkem film rejiseri Sergei Dvortsevoi Qazaqstanda týyp ósken, alaida keiin Resei azamattyǵyn alǵan.
«Bul máseleni baqylaýda ustap otyrmyz. Árine, ár baiqaýdyń ózindik talaptary bar. Biraq, biz qazir kinotúsirilim tobynda qazaqstandyqtar jumys istegenin, ekinshi planda oinaǵanyn dáleldep jatyrmyz. Bul - amerikalyq taraptyń resmi habary emes. Sondyqtan, Oskar úmitkerleriniń qataryna qosylatyn múmkindigimiz kóp. Amerikalyq taraptan jaýap kútýdemiz», - dedi A. Raiymqulova Ortalyq kommýnikatsiialar qyzmetinde ótken brifingte.
Vitse-ministrge «Aika» ótpegen jaǵdaida, Oskarǵa qandai qazaqstandyq film usynylady?» degen suraq qoiyldy.
«Bul óte bedeldi syilyq jáne onyń birqatar talaptary bar. Emir Baiǵazin laiyqty úmitker bolar edi, biraq ýaqyt talabyna bailanysty, onyń filmin kelesi jyly ǵana usyna alamyz. Iaǵni, «Aika» - ýaqyty, mártebesi jaǵynan eń qolaily ónim bolyp otyr. Onyń Kann kinofesivaliniń jeńimpazy degen ataǵy bar jáne shyn máninde nasihattalýy tiis sapaly film. Qazaqstan úshin «Aika» filmin Oskarǵa usyný - úlken mártebe bolar edi», - dep jaýap berdi vitse-ministr.
