Úkimettik emes sektor sailaýǵa táýelsiz baǵa berýi kerek. Sybailas jemqorlyqqa qarsy is-qimyl agenttigi janyndaǵy arnaiy monitoring tobynyń basshysy Aigúl Soloveva aldaǵy sailaý jaily osylai dedi, dep habarlaidy QazAqparat.
«Úkimettik emes uiymdar táýelsiz baiqaý júrgizetin Beipartiialyq sailaýdy baiqaý ortalyǵyn ashty. Sol sebepti protsedýra boiynsha biz sailaýǵa keletin azamattarmen kezdesýimiz kerek. Bárimiz de sailaý protsesine qatysýshymyz. Bizdiń mindet – sailaýǵa bara jatqanyn partiialardyń quramyn anyqtaý. Álbette qai partiiadan qansha adamnyń úmitker retinde túsetinin bilemiz. Alaida onyń quramy qanshalyqty sapaly, qansha áiel men jastar bar, olardyń baǵdarlamalary qandai, olardyń senimdi ókilderi kim – osynyń bárin bilgimiz keledi», - dedi Aigúl Soloveva tilshilermen Beipartiialyq sailaýdy baiqaý ortalyǵynda ótken kezdesýde.
Ol óz jariia etken hartiiada barlyq saiasi kúshtermen birge jumys júrgizý týraly arnaiy pýnkt baryn aityp ótti.
«Buǵan deiin Beipartiialyq sailaýdy baiqaý ortalyǵy Adal partiiasynyń múshelerimen, keshe «Aýyl» partiiasynyń múshelerimen kezdesti. Endi búgin taǵy úsh partiiamen kezdesý ótkizemiz. Biz partiialardyń protsesterin baqylap, olarǵa monitoring júrgizemiz. Máselen, belgili bir partiia ekinshi partiiaǵa qatysty tártip nemese ereje buzsa, Beipartiialyq sailaýdy baiqaý ortalyǵy onyń bárin tirkep otyrýy tiis. Sebebi onyń nátijesi boiynsha biz esep ázirleimiz. Biz úkimettik emes sektor retinde sailaýǵa táýelsiz baǵa berýimiz kerek», - dedi ol.
