Mádeniet jáne sport ministri Arystanbek Muhamediuly men Túrkiianyń belgili rejisseri Metin Giýnai Túrkistan oblysyndaǵy Otyrar qalashyǵyn aralady.
Qazaq handyǵy men tarihy, dańqty batyr Qasym hannyń el bolashaǵy úshin aianbai sińirgen eńbegi jaily tarihi film túsirilmek. Film siýjetin Uly Jibek joly boiyndaǵy osy kóne qaladan bastaý josparlanyp otyr. Maqsat – tamyry tereń tarihymyz ben batyrlar jolyn tek Qazaqstanǵa ǵana emes, dúniejúzine tanytý.
Qazaqstannyń Tuńǵysh Prezidenti Nursultan Nazarbaevtyń arnaiy shaqyrtýymen aýqymdy jobany qolǵa alǵan tanymal rejisser Metin Giýnai jyldyń tórt mezgilin de qamti otyryp úsh jyl ishinde kóp serialy tarihi film túsirýdi qolǵa alǵan. Kino arqyly elimizdiń uly tulǵalaryn álemge tanytý maqsatynda QR Mádeniet jáne sport ministrligi keńinen qoldaý kórsetýde, dep jazdy otyrar.kz.
"Er tuǵyryl" kinosynyń rejisseri Metin Giýnai Elbasynyń shaqyrýymen Qazaqstanǵa kelip úlken jobany qolǵa alýda. Qasymhan jaily kinonyń stsenariiin keremet etip jazyp shyqty. Bul joba — kúrdeli ári aýqymdy bolǵandyqtan biz jan-jaqty daiyndyq jumystaryn júrgizip jatyrmyz", - dedi Arystanbek Muhamediuly.
Onyń aitýynsha, Qazaqstan osy iri jobalar arqyly kóne qalalarymyz Otyrar, Saýran, Saraishyqtardy dúniejúzine pash etýdi kózdep otyr. Sondai-aq tarihi oryndarǵa restavratsiialyq jumystar júrgizilmek.
"Tarihymyzdy tanytý arqyly Qazaqstanǵa dúniejúzi týristerin shaqyra alamyz", - dep túsindirdi ministr.
"Ata topyraǵymyzǵa kelgenime qýanyshtymyn. Osy ólkeni maǵan arnaiy kelip tanystyrǵan ministr Arystanbek Muhamediulyna erekshe alǵysymdy aitamyn. Bizdiń tarihymyz ortaq. Tarihi tulǵanyń ómiri jaily film túsirýdi qolǵa alyp jatyrmyz. Dál qazir bizge yńǵaily oryndarmen tanysyp jatyrmyz. Úlken is jasaýdy josparlaǵandyqtan shynaiy, tarihi jerlerdi qarastyrýdamyz. Taǵy da úsh meken josparda bar", - dedi Metin Giýnai.
