Soltústik Qazaqstan oblysynda áielin óltirip, qyzy men 12 jasar jienine qastandyq jasaǵan er adamǵa qatysty sot úkimi shyqty, dep habarlaidy QazAqparat.
SQO boiynsha mamandandyrylǵan aýdanaralyq qylmystyq sot áielin atyp óltirip, taǵy eki adamdy, onyń ishinde 12 jastaǵy balany óltirýge oqtalý faktisi boiynsha 58 jastaǵy Iýrii Glýshkovqa qatysty qylmystyq isti qarady.
Oqiǵa biyl 10 mamyrda Timiriazev aýdanynda bolǵan edi. Erli-zaiyptynyń merekelik otyrysy janjalmen aiaqtalyp, áiel qyzynyń úiine ketip qalady. Mas er adam jubaiyn úiine qaitarmaq bolady, biraq janjal qaita órship, kúieýi myltyq pen pnevmatikalyq tapanshany paidalanyp, áielin atyp tastaidy. Keiin qylmysty jasyrý úshin jienin jáne onyń anasyn óltirmek bolady.
Iýrii Glýshkov áielin basynan jáne keýdesinen atqan. Keiin 12 jasar jienine de oq atap, qyzyna qastandyq jasaidy.
Sotta er adam: «Men olardy óltirgim kelgen joq, tek qorqytpaq boldym», - deidi.
Sottalýshynyń kinási jábirlenýshiniń, kýágerlerdiń aiǵaqtarymen, oqiǵa bolǵan jerdi qaraý hattamasymen jáne saraptamalar qorytyndysymen dáleldendi. Qylmystardyń jiyntyǵy boiynsha prokýror er adamdy 25 jylǵa bas bostandyǵynan aiyrý jazasyn taǵaiyndaýdy surady. Zardap shegýshiler ony qoldady.
Sottalýshynyń qylmysty mas kúide jáne qarýdy qoldana otyryp jasaýy – onyń jazasyn aýyrlata tústi. Al múliktik ziiandy óz erkimen óteýi er adamnyń jazasyn jeńildetetin jaǵdai retinde qaraldy.
Sot qylmystyq quqyq buzýshylyqtardyń jiyntyǵy boiynsha er adamǵa 23 jylǵa bas bostandyǵynan aiyrý jazasyn taǵaiyndady. Sottalýshy jazasyn qylmystyq-atqarý júiesiniń eń joǵary qaýipsizdik mekemesinde óteitin bolady.
