Messendjerler men áleýmettik jelilerde taratylyp jatqan QR Prezidentiniń Jarlyǵymen 2023 jylǵy 1 qańtardan bastap áielderdiń zeinetke shyǵý jasy 58 jasqa deiin tómendetiletini týraly aqparat shyndyqqa janaspaidy, dep habarlaidy Eńbek jáne halyqty áleýmettik qorǵaý ministrliginiń baspasóz qyzmeti.
"Áielderdiń zeinetke shyǵýynyń zańnamamen belgilengen jasy halyqaralyq jáne otandyq sarapshylar júrgizgen zertteýler nátijeleri men uzaq merzimdi aktýarlyq boljamdarǵa negizdelgen, halyqaralyq praktikaǵa jáne álemdegi qalyptasyp otyrǵan ekonomikalyq jáne demografiialyq jaǵdaiǵa sáikes keletinin esterińizge salamyz. Bekitilgen jas mólsheri bazalyq jáne yntymaqty zeinetaqyny jáne Biryńǵai jinaqtaýshy zeinetaqy qorynan (BJZQ) tólenetin tólemderdi eskere otyryp, qazaqstandyqtar qurmetti demalysqa shyqqannan keiin tiisti zeinetaqy tólemderin qalyptastyrý qajettiligine negizdelgen", - delingen habarlamasynda.
Bul rette, Eńbek jáne halyqty áleýmettik qorǵaý ministrligi málimetinshe, yntymaqty zeinetaqy júiesi birtindep qysqaryp jatyr, óitkeni olardy taǵaiyndaý kezinde 1998 jylǵy 1 qańtarǵa deiin, iaǵni jinaqtaýshy júie engizilgenge deiin ázirlengen eńbek ótili eskeriledi.
"Osyǵan bailanysty mindetti zeinetaqy jarnalary esebinen qalyptastyrylatyn jinaqtaýshy zeinetaqynyń róli artady, zeinetaqy jarnalaryn aýdarý kezeńi men mólsheri neǵurlym kóp bolsa, ol soǵan sáikes joǵary bolady.
Yntymaqty eńbek ótili joq jáne búginde jinaqtaýshy zeinetaqy júiesine qatyspaityn qazaqstandyqtar úshin 50+ jasynda erte zeinetke shyǵý laiyqty tólemderdi qamtamasyz etpeidi", - delingen habarrlamada.
Sonymen qatar, qoldanystaǵy zańnamaǵa sáikes azamattarǵa zeinetkerlikke erte shyǵý quqyǵy beriledi.
"Osylaisha, BJZQ-da zeinetaqy jinaqtary 55 jasqa (erler) jáne 52,5 jasqa (áielder) tolǵanda jetkilikti bolǵan kezde qazaqstandyqtar zeinetaqy annýitetin resimdei alady (zeinetaqy jasyna jetkenge deiin zeinetaqy jinaqtarynan zeinetaqy tólemderin alý quqyǵy).
2021 jyldan bastap BJZQ salymshylarynyń keiinge qaldyrylǵan zeinetaqy annýiteti shartyn jasasý múmkindigi bar. Iaǵni, áielder ony 42,5 jasta, erler 45 jasta jasai alady. Bul rette saqtandyrý uiymynan tólemder tiisinshe 52,5 jáne 55 jasta júzege asyryla bastaidy.
Ziiandy eńbek jaǵdailarynda jumys isteitin azamattar zeinetaqy annýitetin 40 jastan paidalana alady, bul rette osyndai sharttar boiynsha tólemder 50 jastan bastalady", - delingen vedomstvo habarlamasynda.
Vedomstvo ókilderi azamattardan feikterge nazar aýdarmaýdy jáne aqparatty tek resmi derekkózderden alýdy suraidy. Sondai-aq, jalǵan aqparat taratqandar zań boiynsha jazalanatyny aityldy.
