Búgin, elordada kúres túrlerinen ótip jatqan álem chempionatynyń tórtinshi kúni áielder kúresinen úsh balýanymyz jartylai finalda qarsylastaryna jol berdi, dep habarlaidy QazAqparat.
55 kelide el namysyn qorǵaǵan Marina Sedneva jartylai finalda japoniialyq Irie Nanamiden 10:0 esebimen utylsa, 72 kelide synǵa túsken Jámila Baqbergenova jartylai finalda Olimpiada chempiony, reseilik Natalia Vorobevadan 10:0 esebimen jeńilip qaldy. Al 50 keli salmaqta beldesken taǵy bir balýanymyz Valentina Islamova jartylai finalda rýmyniialyq Emiliia Výkten utyldy.
Endi atalǵan úsh balýanymyz da erteń, iaǵni 18 qyrkúiek kúni qola medal úshin synǵa túsetin bolady.
Esterińizge sala keteiik, osyǵan deiin úsh qazaqstandyq balýan qyz álem chempionatynyń jartylai finalyna ótkeni týraly habarlaǵan bolatynbyz.
