Áielder boksynan Qazaqstan komandasynyń bas bapkeri Erik Alǵabek 28 aqpan kúni Iordaniiada ótetin Aziia/Okeaniia aimaqtyq Olimpiadaǵa irikteý týrnirine qatysatyn boksshylar tizimin atady, dep habarlaidy "Ult aqparat" Olympic.kz-ke silteme jasap.
«51 keli salmaqta Angelina Lýkas joldamaǵa talasady. Ol ózi qatysqan sońǵy halyqaralyq týrnirlerdiń bárinen altyn aldy. Iaǵni, syrtta ótetin jarystarǵa psihologiialyq túrde daiyn ekenin kórsetti. 57 kelide Dámetken Kelimbetke senim artamyz. Bul salmaqta eń sońǵy kúnge deiin irikteý ótip, tańdaý Dámetkenge tústi. Ol Gollandiiada ótken týrnirde ózin jaqsy jaǵynan kórsetken edi. 60 keliniń sózsiz úzdigi – Rimma Volosenko. Ol álem chempionatynda qola júldeger atandy. Sol birinshilikte jeńildi dep aitýǵa aýzymyz barmaidy. Qaraǵandydaǵy Ǵalym Jarylǵapovty eske alýǵa alǵan týrnirde jáne Vengriiadaǵy básekede jeńimpaz atandy. Al 69 kelide Valentina Halzova el namysyn qorǵaidy. Ol álem chempiony ári Aziia chempionatynyń kúmis júldegeri. Halzova dekrettik demalystan ulttyq quramaǵa jaqynda oraldy. Mundai tájiribeli sportshynyń qatarǵa qosylǵany qýantady. Ol babynda. Niderlandta ótken halyqaralyq synda Olimpiada oiyndarynyń júldegerine qarsy jaqsy kezdesý ótkizdi», - deidi bas bapker.
«75 kelide Nadejda Riabets baq synaidy. Nadia jastar komandasynan eresekter qataryna endi ótti. Jasóspirimder Olimpiadasynyń qola júldegeri. Endi Tokio Olimpiadasyna qatysý úshin baryn salady. Litsenziia alatyn múmkindik barlyǵynda bar. Budan bólek, Parijde ótetin álemdik irikteý synyna da daiyndalamyz. Frantsiiada ekinshi jáne úshinshi quram boksshylaryn synap kórmekpiz. Óitkeni, básekelestik joǵary. Tipti, mundai básekelestik erler quramasynda da joq shyǵar. Komanda qazir babynda».
