Almaty oblysyna qarasty Qarasai aýdany, Eltai aýyldyq okrýginiń ákimi Baqytgúl Jumanbaeva jer telimderin taratýdyń qylmystyq sxemasyn uiymdastyrǵan, dep xabarlaidy QazAqparat tilshisi.
QR Memlekettik qyzmet isteri jáne sybailas jemqorlyqqa qarsy is-qimyl agenttiginiń resmi ókili Nurjan Jaxinniń aitýynsha, okrýg ákimi jer telimderin taratqany úshin jalpy somasy 2,5 million teńge kóleminde para aldy degen kúdik bar.
"Budan basqa, jerdi nysanaly paidalanýdy jeke qosalqy sharýashylyǵyna ózgertkeni úshin 20,5 million teńge turatyn 1 gektar jerdi syiaqy retinde alǵan. Qazirgi kezde kúdikti úiqamaqqa alyndy. Is prokýratýraǵa joldandy", - dedi N.Jaxin Astanada ótken baspasóz máslixatynda.
Budan bólek, Almaty oblystyq qurylys basqarmasy zań bóliminiń basshysy Biserik paramen ustaldy. Ol bir kásiporyndy josyqsyz ónim jetkizýshiler reestrine qospaǵany úshin 10 mln teńge kóleminde zańsyz syiaqy aldy degen kúdik bar. Sot sanktsiiasy boiynsha Biserik qamaýǵa alyndy.
"Sondai-aq, qurylys nysandary boiynsha aralyq jumystar aktisine qol qoiǵany úshin 100 myń teńgeniń parasyn alǵan injenerlik jeliler qurylysy bólim basshysynyń mindetin atqarýshy Quljanovtyń áreketi áshkerelendi. Ol óz kinásin tolyǵymen moiyndady. Sol sebepti oǵan qatysty protsessýaldyq ustaý sharasy qoldanylǵan joq. Sotqa deiingi tergeý júrgizilýde", - dep atap kórsetti N.Jaxin.
