QR Parlament Májilisiniń depýtaty Aidos Sarym Memleket basshysynyń jańa Joldaýyna qatysty pikirimen bólisti, dep habarlaidy QazAqparat.
«Joldaýdyń memlekettik mańyzynan bólek, sońǵy ýaqytta elimizde oryn alyp jatqan túrli jaittarǵa qatysty Prezidenttiń bergen jaýaby sekildi. Onyń Olimpiadaǵa qatysty, internet betterinde júrgen basqa da haip taqyrypty qýǵandarǵa Memleket basshysy óz oiyn, pozitsiiasyn Joldaý arqyly jetkizip, jaýap berdi. Joldaýdyń júgi atqarýshy jáne zań shyǵarýshy organdarǵa túsip otyr. Memleket basshysy jyldyń sońyna deiin naqty josparlar qurýmen qatar birneshe zań qabyldaý kerektigin tapsyrdy. Onyń ishinde áńgime biýdjetke de qatysty bolyp otyr. Joldaýdan keiin aldaǵy 2-3 jyldyń biýdjeti qaita qaralatyn sekildi. Sebebi Toqaev el biýdjetiniń júiesizdigin de synady», - dedi Aidos Sarym QR Sybailas jemqorlyqqa qarsy is-qimyl agenttiginde ótken «Antikor Live» jobasynyń efirinde.
Halyq qalaýlysynyń oiynsha, Memleket basshysy Joldaýda qoǵamdy jii tolǵandyratyn túitkilderdi kóterdi.
«Aitar bolsaq, qoǵamda jii talqyǵa túsip júrgen, atom energiiasy, jer jáne til máselesin Prezident nazardan tys qaldyrǵan emes. Joldaý ishinde buryn qozǵalmaǵan taǵy bir sát, ziialy qaýym máselesi. Memleket basshysy óz sózinde ziialy qaýymdy qoldaý kerektigin, olar bilik pen halyqty jalǵaityn orta ekenin eskertti. Endigi maqsat - aitylǵan nárseni oryndaý. Prezident tapsyrmalaryna qatań baqylaý ornatý kerek. Kerek jerinde qattyraq aityp otyrǵan da jón», - deidi ol.
