foto: Sputnik Qazaqstan
QR Parlamenti Májilisiniń depýtaty Aidos Sarym «Jańa Qazaqstan» depýtattyq tobynyń basty maqsatyn atady, dep habarlaidy QazAqparat.
«Jańa Qazaqstan» depýtattyq tobynyń qurylýy sebebi, onyń sharty týraly aitýǵa ruqsat etińizder. Ózderińiz bilesizder, keshe Májilistiń jalpy otyrysynda áriptesimiz Edil Jańbyrshin málimdememizdi jariialaǵan bolatyn. Qazir ol kisi Úkimette Jańaózen máselesi boiynsha kelissóz júrgizip jatyr. Bizdiń basty maqsatymyz - qańtar tragediiasynan keiingi elimizdegi shynaiy reformalardy qoldaý. Birinshiden - Prezident bastaǵan eldi jańǵyrtatyn bastamalardy qoldap, olardy sabatajǵa, toqtaýǵa, sońyna ysyrýǵa jol bermeý. Ekinshiden kez kelgen úlken saiasi reformalar zań shyǵarýshy jáne ókiletti organnan bastalýy kerek. Bizdiń túpkilikti maqsatymyz - Májilistiń jumysyn jańa jolǵa, jańa arnaǵa burý. Onyń ishinde Májilistiń ashyqtyǵy, belsendi áńgime kóterip, ony qozǵaýy da bar. Bul - úlken máseleniń biri», - dedi ol elordada uiymdastyrǵan baspasóz máslihaty barysynda.
Sonymen qatar ol «Jańa Qazaqstan» depýtattyq toby Májilistiń reglamentin, Májilis týraly, Májilis depýtattary týraly zańnamany ózgertýge kúsh salatyndyǵyn basa aitty.
«Bul - ózimizdiń qolymyzda turǵan nárse. Elimizde júrgizip jatqan biýdjettik baǵdarlamalarynyń tiimdiligin arttyrý maqsatynda Úkimetpen jáne basqa da memlekettik organdarmen qoian-qoltyq jumys istep, talaptardy kúsheitemiz. Jaqynda Preident naýryz aiynda úlken saiasi reformalardyń jariialanatyndyǵyn aitty. Soǵan belsene atsalysamyz. Eldegi reformalardyń durys júrgizilýin, onyń shyn máninde qoǵamnyń, halyqtyń talabynan shyǵýyn nazarda ustap, onyń belsendi sýbektisine ainalamyz. Úshinshiden, aimaqtaǵy ókiletti organdardyń jumysyn jandandyrý qajet. Qoǵamdyq keńesterge, máslihattarǵa ózgerister kerek. Olarǵa jaqsy úlgi kórsetý kerek dep oilaimyz. Osy turǵyda da eńbek etemiz», - dedi Aidos Sarym.
