Saiasattanýshy Aidos Sarym saiasi reformalarǵa qatysty usynystardy jariialady. Ol ulttyq qoǵamdyq senim keńesinde arnaiy jumys tobyn basqarady, dep habarlaidy Sputnik Qazaqstan.
Sarapshynyń aitýynsha, búginde saiasi reformalardy bos sóz dep sanaityndardyń qatary kóbeiip keledi. Qoǵam ishinde bireýler ózgeristerdi qalasa, endi bireýler eshteńe ózgermese eken dep otyrady. Ondai adamdar biliktiń ishinde de bar.
"Qazaqstanda saiasi úderisterdiń negizin qalaityn 5—6 zań bar. Eger osy bes zań yryqqa kelse, durys sailaý ótedi, saiasi pliýralizm men saiasi belsendilikke jol ashylady degen paiym bar. Bul zańdar — 1995 jyly qabyldanǵan "Mitingter týraly" zań, 1995 jyldan beri myń ret jamalǵan "Sailaý týraly" zań, 1999 jylǵy "Buqaralyq aqparat quraldary týraly" zań, 2002 jylǵy "Saiasi partiialar týraly" zań jáne "Parlament jáne depýtattar týraly" zań", — dedi Sarym.
Saiasattanýshynyń sózine qaraǵanda, bul zańdardy zaman talabyna qarai jańadan jazyp shyǵý qajet. Atap aitqanda, mitingiler týraly zańda aldymen azamattardyń óz oiyn aitý quqyqtaryn qamtamasyz etý kerek. Beibit sherýlerdiń sipatyn zańmen belgilep qoiǵan jón.
"Saiasi partiialar týraly zańnamada azamattardyń saiasi múddesine sai partiialarǵa birigip, olardy qurý men memlekettik tirkeýge qatysty shekteýler azaitylýy tiis. Al buqaralyq aqparat quraldary týraly zańnama BAQ degen uǵymdy durys anyqtaý, jalǵan aqparat uǵymyn dekriminalizatsiialaý, daý—damaidy sotqa jetkizbei sheshý turǵysynda qabyldanýy qajet dep sanaimyz", — dep atap kórsetti Sarym.
Budan bólek, jumys tobynyń músheleri sailaý zańnamasy aiasynda parlament pen máslihattardy sailaýdyń aralas júiesine kóshirý, partiialardyń májiliske ótý mejesin tómendetý, halyqtyń aýdan deńgeiine deiingi ákimderdi tikelei sailaýy tiis dep otyr.
"Parlament depýtattary týraly zańnama da qaita qaralýy kerek dep otyrmyz. Qujatta parlamenttiń atqarýshy bilikten táýelsizdigin qamtamasyz etý, parlamenttik oppozitsiianyń qyzmetine múmkindik berý, parlament qyzmetiniń ashyqtyǵy men jaýapkershiligin arttyrý máselesi qamtylýy tiis ", — deidi Sarym.
Onyń aitýynsha, elimizde saiasi reformalar týraly aitý ońai bolsa da, ony iske asyrý — qiyn másele.
"Shynyn aitý kerek, elimizde saiasi reforma degen taqyryp aitýǵa ońai bolǵanymen is júzinde asa kúrdeli. Qazaqtyń qyzyl tiline salsaq, úsh aptada saiasi jumaq ornatýǵa bolatyn siiaqty. Biraq aqiqatyna kelsek, jumys tobynyń ishinde de qyzý talqylaý boldy",— dedi saiasattanýshy.
Aita keteiik, Nur-Sultanda prezident janyndaǵy ulttyq qoǵamdyq senim keńesiniń alǵashqy otyrysy ótti. Keńes biyl maýsymda Toqaevtyń jarlyǵymen qurylǵan bolatyn.
