TYMK-tyń beiresmi sammiti qazaq mádenieti men rýhaniiaty úshin tabysty boldy. SIM Halyqaralyq aqparat komiteti tóraǵasynyń orynbasar ókili Aibek Smadiiarov osyndai pikir aitty, dep habarlaidy QazAqparat.
Aibek Smadiiarov bul Túrki keńesiniń alǵashqy beiresmi sammiti bolǵanyna eske saldy. Sondai-aq, ol Qazaqstannyń Túrki investitsiialyq-yntymaqtastyq qoryn qurý bastamasy qazir qandai satyda turǵanyn aitty.
«Bul bastama Qazaqstan Respýblikasynyń Prezidenti N.Á.Nazarbaevtyń 2015 jylǵy 11 qyrkúiekte Astana qalasynda ótken Túrki keńesiniń 5-shi Sammitinde kóterilgen bolatyn. Túrki keńesine múshe memleketter atalǵan bastamany biraýyzdan qoldady. Atalǵan bastamany júzege asyrý maqsatynda jyldar boiy birqatar kezdesýler uiymdastyryldy. Qazirgi tańda taraptar qordyń quryltaishy qujattaryn ázirlep jatyr», - deidi SIM ókili.
Beiresmi sammittegi basty oqiǵanyń biri – Túrkistan qalasynyń Túrki áleminiń rýhani astanasy bolyp jariialanýy desek, qatelespeimiz. Aibek Smadiiar Túrkistan deklaratsiiasy baýyrlas elderdiń mádeni jáne rýhani yntymaǵyn arttyrady degen oi aitty.
«Osy múmkindikti paidalana otyryp, barlyq oqyrmandaryńyzdy kieli Túrkistan qalasyn Túrki áleminiń rýhani astanasy bolyp jariialanýymen quttyqtaimyz! Beiresmi sammittiń qorytyndysy boiynsha keshe Túrkistan deklaratsiiasy qabyldanǵany málim. Atalǵan qujat múshe memleketterge baǵdar kórsetip, atqarylatyn sharalardy belgileidi. Naqtyraq aitqanda, memleket basshylary Qazaqstan Respýblikasynyń Tuńǵysh Prezidenti-Elbasy, Túrki keńesiniń Qurmetti tóraǵasy Nursultan Ábishuly Nazarbaevtyń 2019 jyly 15 qazanda Bakýde ótken Túrki keńesiniń 7-shi Sammiti aiasynda Túrki keńesiniń ataýyn ózgertý jáne «Túrki áleminiń keleshegi-2040» qujatyn daiyndaý bastamalaryn qoldady jáne atalǵan baǵytta qarqyndy jumys júrgiziletin bolady», - deidi vedomstvo ókili.
SIM ókili sammit sheshimi boiynsha Álihan Bókeihandai birtýar tulǵanyń 155 jyldyǵy Túrki yntymaqtastyq uiymdarymen birlese otyryp toilanatynyn eske saldy.
«Túrki áleminiń ádebieti, óneri, ǵylymy men mádenietiniń damýyna úlken úles qosqan Túrki áleminiń asa kórnekti aqyndary, oishyldary men memleket qairatkerleriniń mereitoilaryn atap ótý úshin múshe memleketterdiń tiisti organdaryna Túrki yntymaqtastyq uiymdarymen birlese otyryp kelisilgen is-sharalar ótkizýge tapsyrma berildi. Atalǵan tizimde qazaqtyń birtýar uldary aqyn Jambyl Jabaevtyń 175 jyldyq jáne Álihan Bókeihannyń 155 jyldyq mereitoilary bolǵanyna nazar aýdarǵymyz keledi.
Túrkistan beiresmi sammiti barysynda memleket basshylarynyń kótergen bastamalary da Túrki keńesiniń kún tártibinde bolady. Bul baǵytta da tiisti jumystar men konsýltatsiialar júrgiziledi», - dedi Aibek Smadiiarov.
