Semei qalasynda koronavirýspen aýyryp shyqqan bilim mekemeleriniń basshylary immýndyq plazma donory boldy. Olardyń arasynda elektrtehnikalyq kolledj direktory Azat Sarpekov pen kólik kolledjiniń direktory, qazaqsha kúresten álemniń úsh dúrkin chempiony, «Álem barysy» jarysynyń eki dúrkin jeńimpazy Aibek Nuǵymarov bar, dep habarlaidy "Ult aqparat".
Qaladaǵy eki jetekshi kolledjdiń direktorlary qaýipti derttiń barlyq aýyrtpalyǵyn bastan ótkizip, koronavirýsqa shaldyqqandarǵa qol ushyn sozyp, onymen kúres jolyna túspek bolǵandary jaily baiandady.
«Dárigerlerdiń arqasynda aýrýdan tolyq jazylyp shyqtym. Búginde plazma donory bolý múmkindigi bar. Koronavirýspen aýyrǵan adam retinde basqa adamdarǵa kómektesýge daiynmyn. Meniń qanym bireýdiń saýyǵyp ketýine kómegin tigizse, tek qana qýanamyn», - dep atap ótti A.Sarpekov.
Qalalyq aqparat ortalyǵy Semei qalasynyń Qan ortalyǵynda COVID-19-ǵa antidenesi bar immýndyq plazma daiarlaý úshin donorlar tizimi jasalyp jatqanyn habarlady.
Immýndyq plazma – adam qanynyń qandai da bir infektsiialyq agentterge qarsy antideneden quralǵan bóligi. Mysaly, koronavirýs infektsiiasymen aýyrǵan adamdardyń plazmasynda bul aýrýmen kúresýge kómektesetin antidene bar.
Koronavirýspen aýyrǵan adamdardyń immýndyq plazmasyn qaita quiý kezinde retsipientte passivti immýnitet qalyptasyp, oǵan bul dertpen kúresýge kómektesedi.
Koronavirýspen aýyrǵandardyń bári birdei immýndyq plazma donory bola almaidy. Plazmany daiarlaý úshin koronavirýs infektsiiasyna antidene jetkilikti adamdar ǵana donor bola alady. Immýndyq plazmany qaita quiý naýqastardy emdeý jáne saýyqtyrý protsesin jyldamdatady.
Eske sala keteiik, Semei kólik kolledjiniń direktory, Qazaq kúresinen álem chempiony, «Álem barysy» týrniriniń eki dúrkin jeńimpazy Aibek Nuǵymarov koronavirýs juqtyrǵan bolatyn.
