Shyǵys Qazaqstan oblysyndaǵy eldi mekender halqy erteń alǵash ótkeli otyrǵan aýyl ákimderiniń sailaýyna zor qyzyǵýshylyq bildirip otyr. Osyndai pikirdi «Partiialyq emes baqylaý ortalyǵy» respýblikalyq qoǵamdyq birlestiginiń ShQOF tóraǵasy Aiaýjan Ashimova bildirdi, dep habarlaidy QazAqparat.
«Óńir boiynsha 300-den astam adamdy baiqaýshy retinde daiarlap, arnaiy oqytýdan ótkizdik. Erteńgi sailaýda oblystaǵy barlyq ýchaskelerde bizdiń baiqaýshylarymyz jumys isteidi. Sailaý aýyldy jerlerde ótetindikten olar eldi meken turǵyndarynyń arasynan irikteldi. Qoiylǵan basty talaptar – azamattardyń nieti men belsendiliginiń bolýy», - dedi Aiaýjan Ashimova.
Onyń aitýynsha, baiqaýshylar aýyl halqynan tańdalyp alǵandyqtan aldaǵy ýaqytta jańa sailanǵan ákimniń jumysyna tikelei kýá bolyp, óz baǵalaryn bere alady.
«Oblystaǵy aýyl jurtshylyǵy sailaýǵa zor qyzyǵýshylyq bildirip otyr. Bul sailaý der kezinde ótkizilip jatyr dep oilaimyn. Sebebi qazir buqara halyq osyndai protsedýralarǵa daiyn. Kópshiliktiń quqyqtyq saýattylyǵy joǵary. Biz ózimizdiń baiqaýshylardy oqytqan kezde tek zań normalaryn túsindirip qana qoimai, kútpegen jaǵdailar bolyp qalǵanda qalai áreket etý kerektigin pysyqtadyq», - dedi «Partiialyq emes baqylaý ortalyǵy» respýblikalyq qoǵamdyq birlestiginiń Shyǵys Qazaqstan oblystyq filialynyń tóraǵasy.
Baiqaýshylardy daiarlaýǵa osy salada 15 jyldan artyq ter tógip kele jatqan kásibi mamandar tartylǵan.
