Foto: Freepic.com
Biyl elimizde plagiatqa qatysty 7 is qaraldy. Bul týraly Ádilet vitse-ministri Botagóz Jaqselekova aitty, dep habarlaidy Kazinform.
«Plagiatqa qatysty aitar bolsam, búginde avtorlyq quqyqty buzǵany úshin jaýapkershilik bar. Jaýapkershilikti qatańdatý nemese qaita qaraý, iaǵni kez kelgen jaýapkershilikti iske asyrý atalǵan normany qoldaný quqyǵynyń qorytyndysy boiynsha júzege asyrylady. Biyl 10 tulǵaǵa qatysty nebári 7 is boldy, onyń tek ekeýi ǵana plagiat faktisi. Demek, búginde jaýapkershilikti qatańdatý nemese kúsheitý qajettiligin kórip otyrǵanymyz joq», - dedi ol Ortalyq kommýnikatsiialar qyzmetindegi brifingte BAQ ókilderiniń saýalyna orai.
Osy oraida vitse-ministr Memleket basshysy biyl ziiatkerlik menshik salasyndaǵy eki zańǵa qol qoiǵanyn atap ótti.
Onyń birinshisi – «TMD-ǵa qatysýshy memleketterdiń aqparattyq-telekommýnikatsiialyq jelilerde avtorlyq quqyq pen sabaqtas quqyqtar obektilerine quqyqtardy saqtaý jáne qorǵaý boiynsha yntymaqtastyǵy týraly kelisimdi ratifikatsiialaý týraly» Zań. Kelisimniń maqsaty – avtorlyq quqyq jáne sabaqtas quqyqtardy qorǵaý salasyndaǵy yntymaqtastyqty odan ári tereńdetý, Dostastyqqa qatysýshy memleketter arasyndaǵy saýda-ekonomikalyq jáne mádeni bailanystardy keńeitý.
Ekinshisi – «TMD-ǵa qatysýshy memleketterdiń jalǵan taýar belgileri men geografiialyq nusqaýlardy paidalanýdyń aldyn alý jáne jolyn kesý jónindegi yntymaqtastyǵy týraly kelisimdi ratifikatsiialaý týraly» Zań. Kelisimde taraptarǵa jalǵan taýar belgileri men geografiialyq nusqaýlary jazylǵan taýarlardy óndirý jáne ótkizý faktileriniń aldyn alý, anyqtaý jáne jolyn kesý, sondai-aq mundai taýarlardy TMD-ǵa qatysýshy elderdiń memlekettik shekaralary arqyly ótkizý máseleleri boiynsha yntymaqtastyqty júzege asyrýǵa múmkindik beretin jaǵdailar jasaý kózdelgen.
