Azamattarǵa arnalǵan úkimet» memlekettik korporatsiiasynyń qoǵammen bailanys departamentiniń basshysy Murat Jumanbai tsifrlandyrýdyń arqasynda memlekettik qyzmetti alý jeńildei túskenin aityp berdi, dep habarlaidy QazAqparat.
«Ózderińiz biletindei, memlekettik qyzmetti elektrondy formatqa aýystyrý isine qatty kóńil bólip kelemiz. Máselen, keiingi bir jarym jylda mamandandyrylǵan HQO-ǵa baryp, ýaqyt joǵaltpai, egov.kz portaly arqyly avtokólikti esepke qoiyp, júrgizýshi kýáligin aýystyrýǵa bolady. Álbette, kez kelgen jańashyldyqty adamdar áý basta birden qabyldai qoimaityny anyq. Alaida, Qazaqstanda egov.kz portaly arqyly memlekettik qyzmetti alatyn avtokólik ieleriniń sany ondaǵan ese artqanyn aita ketý kerek», - deidi Murat Jumanbai.
Onyń jazýynsha, 2019 jyly onlain tártippen resimdelgen júrgizýshi kýáliginiń sany 8 ese, al onlain tártipte qaita tirkelgen avtolardyń sany 20 ese artqan.
«2018 jyly júrgizýshi kýáligin 19 409 qazaqstandyq onlain tártipte resimdese, 2019 jyly 153 myń adam resimdegen. 2018 jyly elektrondy tártip boiynsha 5 myń adam kóligin qaita tirkese, olardyń sany byltyr 100 myńnan asyp ketken», - deidi ol.
