City Transportation Systems (burynǵy «Astana LRT») kompaniiasy áleýmettik jelidegi elorda turǵynynyń shaǵymyna qatysty túsinikteme berdi, dep habarlaidy "Ult aqparat".
Aita keterligi, Facebook-tegi «Astana, hochý pohvalit/pojalovatsia» tobynda jazba qaldyrǵan Alma Berkembaeva esimdi jeli qoldanýshy qoǵamdyq avtobýstyń ýaqytynda kelmeýi saldarynan jumysyna 1,5 saǵat keshikkenin jazǵan bolatyn.
«24 jáne 24A baǵdaryndaǵy avtobýs 50 minýt bolmaǵan. Adamdar jumysyna keshigip, avtobýstaǵy oryn úshin tóbelesip qalǵan. Bul endi masqara ǵoi. Dál osy ýaqyt aralyǵynda jartylai bos 104-shi júrdek baǵdar avtobýsynyń úsheýi ótken. Mundaiǵa qalai jol berýge bolady? Bul birinshi ret emes. Tańerteńgi jáne keshki qaýyrt ýaqytta balalardy aitpaǵannyń ózinde eresekter birin-biri taptap kete jazdaidy», - dep jazdy ol.
Onyń sózine qaraǵanda, avtobýs júrgizýshileri kei ýaqytta aialdamaǵa toqtamai ketedi. Sebebi kólik ishine adam lyq tolýy saldarynan esigi de ashylmai qalady.
«Aitpaqshy, áriptesim aialdamaǵa saǵat 8-30-da kelgenimen kelesi avtobýsqa saǵat 9-25-te ǵana otyra alǵan», - dedi áleýmettik jeli qoldanýshy.
Osy máselege qatysty City Transportation Systems kompaniiasynyń baspasóz qyzmeti túsinikteme berdi.
«Atalǵan ýaqytta bul aialdamada avtobýs saǵat 8-30-da jáne 9-04-te bolǵan. Kestege sáikes, saǵat 8-55-te taǵy bir avtobýs bolýy tiis edi. Alaida tehnikalyq aqaýǵa bailanysty avtobýs jelige jiberilgen joq. Sonyń saldarynan saǵat 8-30-ben 9-04 aralyǵyndaǵy avtobýsty kútý uzaqtyǵy 34 minýt boldy. Atalǵan avtobýs aqaýy joiylǵannan keiin tústen keiin ǵana jelige shyqty. Bul rette atalǵan baǵdardaǵy avtobýs qozǵalysynyń josparly qozǵalys aralyǵy 10-20 minýtty quraidy», - dedi kompaniiadan.
Kompaniia málimetinshe, búgin 24, 24A baǵdarynda jolǵa shyqqan avtobýstardyń sany jospardyń 88 paiyzyn quraǵan.
«Qazirgi ýaqytta bul baǵdarda avtobýstardy tolyqtai jelige shyǵarý máselesi qarastyrylyp jatyr», dep atap ótedi kompaniianyń baspasóz qyzmeti.
