Taldyqorǵanda Qazaqstan Respýblikasy Aýyr atletika federatsiiasy jattyqtyrýshylar keńesiniń otyrysy ótti, - dep habarlaidy Tengrinews.kz tilshisi Mádeniet jáne sport ministrliginiń baspasóz qyzmetine silteme jasap.
"Otyrys barysynda jattyqtyrýshylar keńesiniń kópshilik daýysymen aýyr atletikadan Qazaqstan quramasynyń bas bapkeri bop Dáýren Bekmuhamedov sailandy. Bul jaǵdaiǵa Albert Linderdiń ólimi men odan keiingi birqatar oqiǵa, sportshylardyń, jattyqtyrýshylardyń, sondai-aq, Albert Linderdiń týystarynyń kóptegen úndeýi sebep boldy.
Oqiǵaǵa ministr aralasqannan keiin jattyqtyrýshylar shtaby tarapynan óreskel erejebuzýshylyqtar anyqtaldy, sonyń saldarynan quramanyń bas jattyqtyrýshysy Baqyt Ahmetov, aǵa jattyqtyrýshy Sergei Sedov jáne basqalary jumystan shettetildi", - delingen habarlamada.
Sonymen qatar, sporttaǵy ádiletsizdik týraly ótinishterdiń kóbeiýine jáne ony rastaityn dálelderdiń anyqtalýyna bailanysty keńeste erkin stildegi tanymal qazaqstandyq palýan, Qazaqstan Respýblikasynyń eńbek sińirgen sport sheberi, 2000 jyly ótken Sidnei Olimpiadasynyń kúmis júldegeri Islam Iliasovich Bairamýkov sport boiynsha ombýdsmen bolyp taǵaiyndalǵany aityldy.
