Halyqaralyq aýyr atletika federatsiiasy (IWF) Aziia chempionatyn Nur-Sultannan Tashkentke (Ózbekstan) aýystyrǵanyn málimdedi. Bul týraly uiymnyń resmi saitynda 17 aqpan kúni resmi aqparat shyqty.
«Koronavirýstyń órshýine qatysty Qazaqstan Respýblikasynyń úkimeti aýrýdyń taralý qaýpine bailanysty Qytaidyń kórshi jáne kórshiles elderinen jolaýshylar qozǵalysynyń barlyq túrlerin shektedi. Aziia aýyr atletika federatsiiasynyń (AWF) atqarýshy keńesi jaǵdaidy shuǵyl túrde talqylap, qurlyqtyq birinshilik ótetin jerdi Qazaqstannan Ózbekstanǵa aýystyrýǵa kelisti», - delingen málimdemede.
Aita keterligi, Aziia chempionaty endi 16-25 sáýir kúnderi Tashkent qalasynda ótedi.
