Las-Vegasta ótip jatqan aýyr atletikadan jasóspirimder arasyndaǵy Álem chempionatynda qazaqstandyq aýyr atlet Sápi Esengeldi ulttyq komanda qorjynyna úshinshi altyn medaldi saldy, dep habarlaidy QazAqparat tilshisi.
«Búgin Qazaqstan quramasynyń qorjynyna taǵy bir altyn tústi. 81 kelige deiingi salmaqta pomostqa shyqqan Sápi Esengeldi qossaiys boiynsha 309 keli (julqa kóterýde 134 kg, serpe kóterýde 175 kg) salmaqty baǵyndyryp, altyn medalǵa ie boldy. Sápi úshin bul birinshi halyqaralyq saiys», - dep habarlady Qazaqstan aýyr atletika federatsiiasynyń baspasóz qyzmetinen.
Eske sala ketsek, qazirgi ýaqytta Las-Vegasta aýyr atletikadan jasóspirimder arasyndaǵy Álem chempionaty ótip jatyr. Dodada el namysyn bes sportshy qorǵaýda.
Chempionattaǵy alǵashqy medaldy Qazaqstan quramasynyń qorjynyna 16 jastaǵy sportshy Sairamkez Aqmolda salǵan edi. Almaty oblysynyń týmasy 61 kelige deiingi salmaq sanatynda altyn júlde jeńip aldy.
Al keshe Qazaqstan aýyr atletika federatsiiasy saiystyń ekinshi kúni 67 kelige deiingi Saihan Taisýev qossaiysta 288 keli kótergenin (127 keli julqa kóterýde jáne 161 keli serpe kóterýde) habarlady.
«Sonymen birge Saihan julqa jáne serpe kóterý jattyǵýynda kishi altyn medaldi ielendi. Budan bólek, Saihan julqa kóterýde óziniń jas sanatynda jańa álemdik rekord ornatty», - dep habarlanǵan bolatyn federatsiianyń málimdemesinde.
