© Photo: Rixabay/Myriam
Parlament Májilisi keibir zańnamalyq aktilerge densaýlyq saqtaý máseleleri boiynsha ózgerister engizý týraly zańdy ekinshi oqylymda qabyldady, - dep habarlaidy Sputnik Qazaqstan.
Zańǵa sáikes, endi aýylǵa jumys isteý úshin baratyn meditsina qyzmetkerlerine 100 eń tómengi jalaqy mólsherinde birjolǵy aqshalai tólem beriledi.
Májilis depýtaty, áleýmettik-mádeni damý komitetiniń tóraǵasy Ashat Aimaǵambetovtiń aitýynsha, bul norma meditsina kadrlaryn yntalandyrý jáne aýyldaǵy kadr tapshylyǵyn joiý úshin qabyldanyp otyr.
"Buǵan deiin biz aýylǵa baratyn jas dárigerlerge birjolǵy kóterme aqy beremiz dep aitqan edik. Qazir biz sol ýádemizdi oryndap otyrmyz. Búgin zań qabyldandy. Endi aýylǵa barǵan, meditsina salasynda isteitin jas maman 100 eń tómengi jalaqy mólsherinde (8,5 mln teńge – Sputnik) birjolǵy kóterme aqy alady", - dedi Aimaǵambetov Májilis kýlýarynda jýrnalisterdiń suraǵyna jaýap berip.
Depýtat bul kóterme aqy qoldanystaǵy áleýmettik kómekterge qosymsha engizilip otyrǵanyn atap ótti.
"Qazir "Diplommen aýylǵa" baǵdarlamasy jáne taǵy basqa kóterme aqy bar, ony eshkim alyp tastaǵan joq. Sol kóterme aqynyń ústine biz taǵy bir jańa kóterme aqyny engizip otyrmyz. Meditsina salasynda isteitin mamandardy qoldaý úshin, aýyldaǵy meditsinany damytý úshin, aýyldaǵy kadr tapshylyǵyn sheshý úshin 100 eń tómengi jalaqyǵa teń kómek beremiz. Biyl onyń mólsheri 9 million teńgege jýyqtaidy", - dedi májilismen.
Aimaǵambetovtiń aitýynsha, aýylǵa baratyn dárigerlerdiń eńbek ótili eskerilmeidi. Olar tek kóterme aqyny alǵannan keiin bes jyl sol aýylda jumys isteýge mindetteledi.
Aita keteri, biyldan bastap elimizde eń tómengi jalaqy 85 myń teńgeni quraidy.
