Aýyldyq jerlerde turatyn qazaqstandyqtar úshin «Bolashaq» halyqaralyq baǵdarlamasyna arnalǵan kvota saqtalady, dep habarlaidy QazAqparat Halyqaralyq baǵdarlamalar ortalyǵyna silteme jasap.
Aýyl turǵyndary jeńildetilgen sharttarmen «Bolashaq» halyqaralyq stipendiiasyn taǵaiyndaý úshin konkýrstyq irikteýge qatysa alady.
Erejege sáikes, halyqaralyq kvotalyq stipendiiaǵa sońǵy úsh jyl boiy aýylda turǵan úmitkerler ǵana ótinish bere alady. Olar sondai-aq, sońǵy eki jylda aýyldyq jerde jumys isteýi kerek.
Sonymen qatar, GPA – aýyldyq kvota boiynsha úmitkerler diplomynyń ortasha baly 4,00-diń ishinde 2,67-den kem bolmaýy qajet. Sondai-aq memlekettik tilden V1 deńgeiinen kem emes, shet tili boiynsha IELTS-ty 9,0 baldan keminde 6,0 ball alǵany týraly sertifikat bolýy mindetti.
Aýyl turǵyndary qujat tapsyrý kezinde sheteldik JOO-yna óz betinshe túsýge mindetti emes. Aýyldyq kvota boiynsha stipendiattar til kýrstarynan ótip, stipendiia taǵaiyndalǵannan keiin baǵdarlama boiynsha usynylǵan JOO tiziminen oqý ornyn tańdai alady.
«Aýyldyq kvotaǵa túsken stipendiattyń kepilge qoiatyn múligi bolmasa, bes kepilger usynylýy múmkin. Ol 50 jasqa tolmaǵan, sońǵy 12 aida turaqty tabysy bar Qazaqstan Respýblikasynyń azamaty bola alady. Sonymen qatar, aýyldyq kvota boiynsha úmitkerler úshin jumystan bosatýǵa jeńildikter qarastyrylǵan.
Óńirlerge jumysqa baratyn túlekter úshin jumys merzimi qysqartyldy. Olar 5 jyl emes, 3 jyl jumys isteýi kerek. Bul shara óńirlerge baryp, aýylda jumys isteitin bolashaqtyqtardyń úlesin arttyrady dep senemiz», - dedi «Halyqaralyq baǵdarlamalar ortalyǵy» AQ basqarma tóraǵasy Ánýar Janǵozin.
Aita keteiik, qujattardy qabyldaý jáne konkýrstyq irikteý protsesi tolyǵymen avtomattandyryldy. Bul halyqaralyq stipendiia syilyǵynyń ashyqtyǵyn qamtamasyz etti. Ótinish berýshiler eGov memlekettik qyzmet kórsetý portaly arqyly óńirden shyqpai-aq ótinish berip, irikteýdiń barlyq satylarynan óte alady.
Esterińizge sala keteiik, biyl «Bolashaq» halyqaralyq baǵdarlamasy boiynsha jetekshi sheteldik joǵary oqý oryndaryna magistratýra, doktorantýra jáne rezidentýraǵa oqýǵa qabyldaý 14 qazanǵa deiin jalǵasady. Taǵylymdamadan ótý úshin qujattardy qabyldaý 5 qyrkúiekte bastalyp, 2022 jyldyń 14 qazanyna deiin jalǵasady.
2022 jyly magistratýra men rezidentýraǵa 385 shákirtaqy, doktorantýraǵa 60 shákirtaqy bólindi.
«Bolashaq» baǵdarlamasynyń sharttaryna sáikes memleket stýdentterge oqý aqysyn, eki jaqqa barý reisin, sondai-aq meditsinalyq saqtandyrý men ai saiynǵy stipendiiany tóleidi. Shákirtaqy mólsheri belgili bir eldegi qalaǵa jáne ómir súrý deńgeiine bailanysty ózgeredi. Mysaly, Niý-Iork pen Londonda ai saiynǵy shákirtaqy 2 myń AQSh dollarynan asady.
