Jergilikti jerlerde biýdjetti qarastyrǵanda qymbat sport klýbtaryna emes balalar men jasóspirimderdiń úiirmeleri men sektsiialaryna qarajat bólýge mán berý kerek. Bul týraly «Qoǵam jáne memleket: «Birgemiz» - 30 jyldyq seriktestik pen damý» atty IX Azamattyq forýmnyń jalpy otyrysynda QR Memlekettik hatshysy Qyrymbek Kósherbaev aitty, dep habarlaidy QazAqparat.
«Biz jas urpaqtyń sábi shaqtarynan mádeniet, ǵylym jáne bilim berý úiirmelerine baryp, sport sektsiialaryna qatysýyna barynsha jaǵdai jasaýymyz kerek. Óitkeni, bul balalardy ózara biriktirip, uiymdasyp tirlik etýge jaqyndastyratyn ózindik tárbie mektebi bolmaq. Jergilikti atqarýshy organdar azamattyq qoǵam ókilderimen birlesip, balǵyn búldirshinderdiń talanttaryn ashyp, talaptaryn shyńdaýǵa, olardyń biik maqsattarǵa umtylýyna jol kórsetýi tiis», - dedi Memlekettik hatshy.
Sonymen qatar ol jergilikti jerlerde biýdjetti qarastyrǵanda qymbat sport klýbtaryna emes balalar men jasóspirimderdiń úiirmeleri men sektsiialaryna qarajat bólý máselesine kóp mán berý kerektigin basa aitty.
«Munan bólek, biz qai jerde turatynyna qaramastan balalardyń quqyǵymen qajettiligi birdei ekendigin eskerýimiz kerek. Sondyqtan aýyl men qala balalarynyń arajigin alshaqtatpai ekeýine birdei deńgeide kóńil bólinýi tiis. Árine, elimiz keń baitaq. óńirlerdiń ósý múmkindigi de árqalai. Aimaqtardaǵy uiymdastyrýshylyq, qarjylyq, kadrlyq áleýet bárinde birdei teń emes. Biraq, biz bar múmkindikti qarastyryp, birinshi kezekte aýyldyq mádeniet jáne demalys oryndaryn, sport úiirmelerin damytýǵa kúsh salýymyz qajet. Aýyldyq jerlerde mádeniet, demalys jáne sport salalar boiynsha barsha uǵymdy, ikemdi standarttar qalyptastyrý qajet», - dedi ol.
Memlekettik hatshy turǵylyqty halyqtyń sany men jergilikti biýdjettiń múmkindigin saralai otyryp, memlekettiń nemese demeýshilerdiń esebinen balalardy fýtbol, hokkei, voleibol, basketbol siiaqty komandalyq oiyn túrlerine jattyqtyratyn bapkerlerdi qyzmetke tartý kerektigin de aitty.
«Sporttyń naq osy komandalyq túrleri balalardy basqa qurdastarymen óara sanasyp, olardyń ujymdasyp sheshim qabyldaýǵa tárbieleidi. Buǵan qosa, aýyldarda balalardy shymyrlyqqa baýlityn dástúrli boks pen kúresti damytyp, jastardyń dúnietanymy men oilaý qabiletin shyńdaityn sporttyń shahmat, kibersport jáne basqa da intellektýaldyq túrlerin órkendetý kerek», - dedi Qyrymbek Kósherbaev.
