QR Ulttyq ekonomika ministri Áset Erǵaliev shaǵyn jáne orta bizneske qoldaý kórsetý jumystaryn baiandady, dep habarlaidy QazAqparat.
«Ekonomikanyń zardap shekken sektorlaryndaǵy kásipkerlerdi qoldaý úshin shaǵyn jáne orta kásipkerlik kreditterin qaita qarjylandyrý júzege asyrylady. Ekonomikalyq qyzmet túrleriniń tizbesi keńeitilip, sýbsidiialaý merzimi 3 aiǵa uzartyldy. Osy is-sharaǵa biýdjetten 18,4 milliard teńge bólindi», - dedi Áset Erǵaliev Úkimettiń búgingi otyrysynda.
Ministrdiń aitýynsha, biylǵy shilde aiynda «Biznestiń jol kartasy» jáne «Qarapaiym zattar ekonomikasy» baǵdarlamalary aiasynda jańa biznes jobalaryn sýbsidiialaý úshin biýdjetten qosymsha 13,2 milliard teńge bólindi. Eki baǵdarlamany qarjylandyrýdyń jalpy kólemi 186,3 milliard teńgeni quraǵan.
«Biylǵy shildede «Jumyspen qamtýdyń jol kartasy» baǵdarlamasy aiasynda «Bastaý-Biznes» jobasynyń túlekterine shaǵyn nesie berý bastaldy. Oǵan 22,5 milliard teńge bólindi. Aýyldaǵy óz kásibin jańadan bastaityn kásipkerlerdiń 5 myńdai jobasyn qarjylandyrý josparlanýda», - dedi Erǵaliev.
