Aýyldaǵy mádeniet uiymdarynda kadr jetispeidi. Bul týraly QR Prezidenti janyndaǵy Adam quqyqtary jónindegi komissiia otyrysynda Mádeniet jáne sport ministri Aqtoty Raiymqulova aitty, dep habarlaidy "Ult aqparat".
«Salanyń aldynda turǵan taǵy bir problema aýyldaǵy mádeniet uiymdarynda kadrlardyń jetispeýshiligi bolyp tabylady. Búgingi tańda aýyldyq jerlerdegi mádeniet uiymdaryndaǵy kadrlardyń tapshylyǵy ár túrli mamandyqtar boiynsha 1200 adamdy quraidy. Onyń ishinde kitaphanashylar, horeograftar, mádeni uiymdastyrýshylar, vokalister, mýzei, aýyldyq klýb qyzmetkerleri jáne basqalary bar», - dedi ministr.
Onyń atap ótýinshe, jergilikti jerlerde jas mamandardy áleýmettik qoldaýǵa baǵyttalǵan birqatar baǵdarlama jumys istemeidi.
«Mysaly, «Diplommen – aýylǵa» jobasy el óńirlerindegi kadr problemasyn sheshpeidi. Mamandardyń kelýine, birinshi kezekte, aýyldaǵy ómir sapasy - turǵyn úidiń bolýy, jalaqynyń laiyqty deńgeii, áleýmettik qoldaý sharalary áser etedi. Bul - izdenýshilerdiń áńgimelesý kezinde qoiatyn basty suraqtary. Bul máseleni sheshý jan-jaqty bolýy kerek. Sheshim retinde aýyldaǵy kópfýnktsionaldy ortalyqtar úshin ámbebap jumysshylardy daiarlaý bolýy múmkin. Mysaly: kitaphanashy- ekskýrsovod – mádeniettanýshy», - dedi Aqtoty Raiymqulova.
