QR Eńbek jáne áleýmettik qorǵaý ministri Berdibek Saparbaev aýyldyq jerlerde maldan túsetin tabysty esepteý qaitadan qaralatynyn málim etti, dep habarlaidy QazAqparat tilshisi.
Aita keteiik, búginde ataýly áleýmettik kómektiń jańartylǵan formaty boiynsha ótinish qabyldaý aiasynda tiisti komissiialar jumys istep jatyr.
«Biz jergilikti ákimshilikterde aitqan bolatynbyz, komissiiany qurǵan kezde adamdar kóp bolýy kerek. Ásirese, komissiia aýyldyq jerlerde qandai tabys bar ekenin aitady. Óńirlerge barǵanda tiisti usynystardy estip júrmiz, osy oraida tiisti normany qaitadan qaraityn bolamyz. Bizdiń oiymyzsha, bir jylqydan nemese siyrdan túsetin tabys qaitadan qarastyrýdy talap etedi. Qazir Premer-Ministrdiń bizge bergen tapsyramys bar, bul turǵyda Eńbek jáne áleýmettik qorǵaý, Aýyl sharýashylyǵy jáne Qarjy ministrligi atalǵan normany pysyqtap, ózgeris engizemiz», - dedi Berdibek Saparbaev elordada tilshilerdiń saýalyna jaýap bere otyryp.
Budan buryn habarlanǵandai, biylǵy jyldyń 1 sáýirinen bastap Ataýly áleýmettik kómektiń jańartylǵan formaty aiasynda, iaǵni respýblika boiynsha 21 myń teńgelik járdemaqyny taǵaiyndaýǵa ótinish qabyldanýda.
Osy oraida búgin QR Eńbek jáne áleýmettik qorǵaý ministri Berdibek Saparbaev elordadaǵy Halyqty jumyspen qamtý ortalyǵynda jinalǵan turǵyndarmen kezdesti.
Ataýly áleýmettik kómektiń bul túri turmysy tómen barlyq otbasylarǵa beriledi. Bir úidi tabysyn eseptegende tek jaqyn týystardyń bir aida tabatyn aqshasy ǵana eskeriledi. Olardyń ishinde ata-analar, balalar, ákesi bir, sheshesi bólek aǵaiyndar, ata-ájeler bar. Bul degenimiz, osy adamdar birge tursa, olardyń tabysy bir otbasynyń kirisi retinde sanalady. Qosalqy sharýashylyq ta kiristiń kózi bolyp esepteledi.
Alaida basqa áleýmettik tólemder esepke alynbaidy. Sonyń ishinde kópbalaly otbasynyń qazirgi memlekettik járdemaqysy (4,16 AEK - 10 504 teńge), «Kúmis alqa» men «Altyn alqanyń» tólemaqysy (6,4 AEK - 16 160 teńge), múgedek balalardyń járdemaqysy men stipendiialar bar.
