Indýstriia jáne infraqurylymdyq damý birinshi vitse-ministri Qaiyrbek Óskenbaev aýyldy jerde óz qyzmetkerlerine baspana salǵan jumys berýshilerge qurylys shyǵyndarynyń 50 paiyzyn sýbsidiialaý qalai iske asatynyn túsindirdi, dep habarlaidy "Ult aqparat".
«Sondai-aq, aýylda turǵyn úi salý tetigin engizýdi usynyp otyrmyz. Bul tetik boiynsha Memleket basshysynyń tapsyrmasyna sáikes aýyldarda qyzmetkerler úshin turǵyn úi salý kezinde jumys berýshi shyǵyndarynyń 50%-yn sýbsidiialaý kózdelgen. Iaǵni, jumys berýshiler sol aýylda ózine qajet mamandarǵa úi salý úshin aqsha jumsaimyn dese, jergilikti ákimshilikterge tizimin beredi. Ákimshilikter ol tizimdi bizge joldaidy. Biz ol jobalardy teksergennen keiin ruqsat beremiz. Osylaisha aýylda jumys berýshi azamattar óz qyzmetterine úi salǵannan keiin oǵan ketken shyǵynnyń 50 paiyzyn memleket sýbsidiia arqyly qaitaryp beredi», - dedi vitse-ministr ortalyq kommýnikatsiialar qyzmetinde.
Onyń aitýynsha, qazirgi tańda 76 aýdanda 2 855 turǵyn úige qajettilik bar. Iaǵni olardyń qurylysyn sýbsidiialaý úshin respýblikalyq biýdjetten 14,3 mlrd. teńge bólý qajet.
