Qazaqstanda sońǵy bes jylda aýyl sharýashylyǵy salasynda 960 jemqorlyq qylmysy tirkelgen. Búgingi tańda 62 qylmystyq is tergelýde, dep habarlady QR Sybailas jemqorlyqqa qarsy is-qimyl agenttiginiń tóraǵasy Marat Ahmetjanov, - dep jazady Sputnik Qazaqstan.
"Búgingi kúni bizdiń tarapymyzdan 62 qylmystyq is qozǵalyp, tergelip jatyr. Bul isterge 2300 sharýanyń qatysy bar. Osy jaǵdaidy resmi túrde qarastyrar bolsaq, onda olardyń barlyǵyn kináli dep tanýǵa bolady. Qazirdiń ózinde júzdegen jańa is qozǵap, sharýalardyń isin toqtata alar edik. Biraq olar kóp jaǵdaida qylmystyq aila-ádisterdiń qurbany bolyp otyr", - dedi ol brifingte.
Qazaqstanda bes jyl ishinde sýbsidiiaǵa 2 trillion teńgege jýyq qarajat bólingen. Osy jyldar boiy laýazymdy tulǵalarǵa qatysty qylmystyq ister turaqty qozǵalyp keldi, dedi agenttik basshysy.
Jalpy aýyl sharýashylyǵy salasynda 960 qylmys tirkelse, onyń jartysynan astamy sýbsidiia jymqyrýǵa (54%) qatysty.
Sybailas jemqorlyqqa qarsy is-qimyl agenttigi taldaý júrgizip, biýdjet qarajatyn bei-bereket paidalanýdy, kóptegen sybailas jemqorlyq shemalaryn jáne sýbsidiia jymqyrý tásilderin anyqtady.
"Qazir 62 qylmystyq is tirkeldi. 16 adam qamaýda otyr. Basqa da kúdiktiler bar. Bir ǵana baǵdarlama boiynsha 80 milliard teńge bólinip, onyń 40 milliard teńgeden astamy tiimsiz igerilgen. Osy salada qabyldanǵan shemalar men aktiler 40 milliard teńgeden astam qarjyny urlaýǵa múmkindik berdi. Tergeý jalǵasýda", - dedi Marat Ahmetjanov.
Onyń aitýynsha, respýblikanyń barlyq derlik óńirinde aýyl sharýashylyǵyndaǵy sýbsidiialardy jymqyrýǵa qatysty qylmystyq is qozǵalǵan.
"Biz tek tergeýge ǵana emes, sybailas jemqorlyq syn-qateri men ony týdyratyn jaǵdailarǵa taldaý júrgizýge de úlken mán beremiz. Bul sybailas jemqorlyq qylmystary ne sebepti jasaldy? Nelikten qazirgi júie oǵan tosqaýyl bola almady? degen saýaldarǵa jaýap izdeimiz. Sondyqtan sońǵy bes jylda 960 qylmys tirkeldi, 460-tan astam adam sottaldy desek, onda bútindei bir júieni buzý qajettiligi týraly oilanatyn ýaqyt jetti", - dedi Ahmetjanov.
Agenttik basshysynyń aitýynsha, mundai jaǵdailarda jaýapkershilik orta býyn men qatardaǵy mamandarǵa júkteledi jáne aýyl sharýashylyǵy taýarlaryn óndirýshilerdiń de osyndai jaýapkershiliktiń qurbanyna ainalýy da jii kezdesedi.
"62 is emes, odan da kóp qylmystyq is tirkelýi múmkin ekenin basa atap ótkim keledi. Sebebi biz sybailas jemqorlyq júiesi men shemasyn anyqtadyq. Barlyq oblys boiynsha tapsyrma berdik, olar birinen keiin biri qylmystyq isterdi tirkei bastady. Durys málimet ala almaǵan sharýalardyń zardap shekpeýi mańyzdy. Aýyl sharýashylyǵy taýaryn óndirýshilerge qatysty qozǵalǵan birqatar qylmystyq is meniń jáne Bas prokýrordyń kelisimi boiynsha toqtatyldy. Óitkeni olarǵa rasynda da durys aqparat jetkizilmegen. Sondyqtan olar osy alaiaqtar men jemqor azamattardyń paidasyna jalǵan aktilerge qol qoiǵan", - dedi tóraǵa.
