Aýyl sharýashylyǵy jerleriniń salyǵy aýyl biýdjetine tikelei baǵyttalýy tiis. Bul usynysty Qazaqstan fermerler qaýymdastyǵynyń tóraǵasy Jigýli Dairabaev aitty, dep habarlaidy QazAqparat.
«Jer – óndiristiń negizgi quraly. Aýyl turǵyndarynyń áleýmettik-ekonomikalyq ahýalyn kóteretin de – osy jer. Sondyqtan, aýyl sharýashylyǵy jerlerinen túsetin salyqty tórtinshi deńgei bolyp esepteletin aýyl biýdjetine tikelei túsýin qarastyrý qajet. Qazir aýyl biýdjeti alty túrli salyqtan quralady. Alaida onyń jiyntyǵy aýyl ákimi apparatynyń bir ailyq jalaqysyn qamtamasyz etýge de jetpeidi. Osyǵan orai, jer reformalary aiasynda salyq kodeksine de tiisti ózgerister engizý kerek dep esepteimiz. Taǵy da qaitalaimyn, aýyl sharýashylyǵy jerleriniń salyǵy aýyl biýdjetine tikelei baǵyttalýy tiis», - dedi J. Dairabaev Jer reformasy jónindegi komissiianyń birinshi otyrysynda.
Sonymen birge, qaýymdastyq tóraǵasy aýdan ákimdikterindegi jer komissiialaryn joiýdy talap etti.
«Tsifrlandyrý qaryshtap turǵan zamanda jemqorlyqqa da, adami faktorǵa da jol joq. Jerdi jalǵa berý protsesi ádil ári jeńil bolýy kerek. Fermerlerdiń tsifrlandyrý salasynda tájiribesi de, biliktigi de az. Sondyqtan, tsifrlandyrýdy engize otyryp, sharýalardy tegin oqytýdy da qolǵa alǵan jón.
Jalǵa beriletin aýyl sharýashylyǵy jerlerin, shabyndyq bolsyn, jaiylym bolsyn, negizgi aktiv retinde qarastyryp, kepildik baǵasyn eselep ósirý qajet. Bul sharýalardyń nesie alýyn múmkindigin jeńildetedi», - deidi J. Dairabaev.
