Parlament Senatynyń jalpy otyrysynda «Qazaqstan Respýblikasynyń keibir zańnamalyq aktilerine agroónerkásiptik keshendi retteý máseleleri boiynsha ózgerister men tolyqtyrýlar engizý týraly» Zańy qabyldandy, dep habarlaidy QazAqparat.
Zań jobasy 13 kodeks pen 29 zańǵa ózgerister men tolyqtyrýlar engizýdi kózdeidi.
«Usynylǵan ózgerister men tolyqtyrýlar aýyl sharýashylyǵyn qarjylandyrýdyń qoljetimdigi, fitosanitariialyq jáne veterinariialyq qaýipsizdikti qamtamasyz etý, veterinariia men agrarlyq ǵylymdy damytý, ákimshilik kedergilerdi joiý, ósimdikter men janýarlar dúniesin saqtaý jáne damytý jónindegi jańa normalardy engizýdi kózdeidi. Orman jáne sý sharýashylyǵyn, erekshe qorǵalatyn tabiǵi aýmaqtardy damytý boiynsha ózgerister, sondai-aq Qazaqstan zańnamasyn EAEO normativtik-quqyqtyq aktilerine sáikes keltirýge baǵyttalǵan ózgerister qarastyrylǵan», - dedi Parlament Senaty Agrarlyq máseleler, tabiǵatty paidalaný jáne aýyldyq aýmaqtardy damytý komitetiniń múshesi Dúisenǵazy Mýsin.
Buǵan qosa, agroónerkásiptik keshende erikti saqtandyrýǵa kóshý, jer resýrstaryn, ásirese, aýyl sharýashylyǵy maqsatyndaǵy jerlerdi utymdy paidalaný, aýyl sharýashylyǵy salasyndaǵy kadr daiarlaý júiesin jetildirý usynylǵan.
«Zań jobasynda kózdelip otyrǵan ózgerister zańnamalyq bazany jetildire otyryp, eńbek ónimdiligin eseleýge, sondai-aq óńdelgen ónim eksportyn ulǵaitý arqyly agroónerkásip salasynyń básekege qabilettiligin arttyrýǵa qolaily múmkindikter qalyptastyrý kútilýde», - dedi D. Mýsin.
Eske sala keteiik, biyl qyrkúiek aiynda «Qazaqstan Respýblikasynyń keibir zańnamalyq aktilerine agroónerkásiptik keshendi retteý máseleleri boiynsha ózgerister men tolyqtyrýlar engizý týraly» zań jobasy QR Parlamenti Senatynyń jalpy otyrysynda jan-jaqty talqylanyp, birinshi oqylymda maquldanǵan edi.
