QR Premer-Ministri Asqar Maminniń tóraǵalyǵymen ótken Úkimet otyrysynda energetika ministri Nurlan Noǵaev 2020 jyldyń I toqsanyndaǵy otyn-energetika kesheniniń damýy týraly baiandady, dep habarlaidy "Ult aqparat" primeminister.kz saityna silteme jasap.
2020 jyldyń I toqsanynyń qorytyndysy boiynsha munai jáne kondensat óndirý kólemi 23,6 mln tonnany qurady, bul jospardyń 103,1% nemese 2019 jyldyń tiisti kezeńiniń 102,6% quraidy. Munai eksporty 18,9 mln tonnany nemese 2019 jyldyń sáikes kezeńine 102,7% qurady.
Jaqyndaǵy OPEK+ otyrysynda osy jyldyń 1 mamyrynan bastap jahandyq munai óndirýdi jalpy táýligine 9,7 mln barrelge deiin azaitý jóninde sheshim qabyldanǵanyna orai, búgingi kúni 2020 jyldyń munai óndirý kóleminiń josparyn 90 mln tonnadan 84,5 mln tonnaǵa tómendetý qarastyrylýda.
«Elimizde júzege asyrylyp jatqan iri jobalardyń arqasynda munai óndirýdiń oń dinamikasy qalyptasty», — dedi N. Noǵaev.
Máselen, Teńiz ken ornynda munai óndirý 2,6%-dy, Soltústik Kaspiide – 22%-dy, Qarashyǵanaqta – 6,6%-dy qurady.
Munaidy óńdeý jalpy 4,03 mln tonnany qurady, nemese 2019 jyldyń sáikes kezeńine 100,7 % qurady.
«Prezident tapsyrmasy boiynsha aýyl sharýashylyǵy taýaryn óndirýshilerge kóktemgi egis jumystaryn júrgizý úshin tómengi baǵamen – litrine 165 teńgege 390 myń tonna dizel otynyn jetkizý uiymdastyryldy», — dedi N. Noǵaev.
Memleket basshysynyń tapsyrmasyna sáikes Úkimettik komissiia bes munai óńirine baryp, sala kásiporyndarynyń ókilderimen kezdesý ótkizdi. Sonyń nátijesinde Is-sharalardyń keshendi jospary bekitildi. Atap aitqanda, jumys oryndaryn saqtaý jáne kásiporyndar qyzmetkerleriniń aǵynyn basqarý boiynsha jol kartalaryn jasaý, shtat sanyn qysqartýdyń negizdiligin qarastyrý boiynsha jumys tobyn qurý, jumys oryndaryn qurýdyń óńirlik kartalaryn sinhrondaýdy qamtamasyz etý týraly sheshim qabyldandy.
Sondai-aq, ártúrli baǵa stsenariileri kezinde óndiristi josparlaý turǵysynan taldaý júrgizildi.
Munaidy turaqty óńdeýdi qamtamasyz etý maqsatynda munai ónimderiniń eksporty boiynsha shekteýlerdi alyp tastaý, eksport kezinde salyqtar men bajdardy ońtailandyrý, RF-tan janar-jaǵar mai materialdarynyń importyna tyiym salýdy engizý boiynsha jumystar júrgizildi.
Memlekettik materialdyq rezervte munai ónimderin saqtaý kólemi ulǵaidy. Búginde munai ónimderin jóneltý júzege asyrylýda. 3,2 myń tonna aviaotyn jáne 11,2 myń tonna benzin tieldi.
Qazaqstanda jasalǵan taýarlardy bir kózden alý tásilimen satyp alý maqsatynda Jer qoinaýyn paidalanýshylardy satyp alý erejesine, «Samuryq-Qazyna» AQ standartyna, NCOC jáne KPO taýarlardy, jumystar men qyzmetterdi satyp alý rásimderine ózgerister engizildi.
Profilaktikalyq baqylaý júrgizýge moratorii jariialandy.
Jer qoinaýyn paidalanýshylardyń kelisimsharttyq mindettemelerin, sondai-aq jumys baǵdarlamalaryn 2020 jyldan kelesi jylǵa kóshirý máselesi qarastyrylýda.
2020 jyldyń qańtar-naýryz ailarynda gaz óndirý kólemi 15,2 mlrd m³, taýarlyq gaz óndirisi — 8,7 mlrd m³ qurady. Taýarlyq gazdyń eksporty 4,24 mlrd m³ qurady. Suiytylǵan munai gazyn óndirý kólemi 0,85 mln tonnany qurady.
Elektr energiiasyn óndirý 29,4 mlrd kVt/saǵ, ýran óndirý kólemi — 5183,6 tonnany qurady.
