Qazaqstan Respýblikasynyń Memlekettik hatshysy Qyrymbek Kósherbaev M. V. Lomonosov atyndaǵy Máskeý memlekettik ýniversitetiniń Qazaqstan filialyna qandai ǵimarat beriletinin aitty, dep habarlaidy QazAqparat.
Buǵan deiin Memleket basshysy Qasym-Jomart Toqaev M. V. Lomonosov atyndaǵy Máskeý memlekettik ýniversitetiniń Qazaqstan filialyn 20 jyldyǵymen quttyqtap, filialǵa jańa ǵimarat beriletinin aitqan edi.
«Memleket Basshysy Qasym-Jomart Toqaevtyń tapsyrmasymen el Úkimeti M. V. Lomonosov atyndaǵy Máskeý memlekettik ýniversitetiniń filialyna QR Aýyl sharýashylyǵy ministrliginiń 13 myń sharshy metr bolatyn 15 qabatty keńsesin berý týraly sheshim qabyldady. Bul bizge reseilik áriptestermen birge basym mamandyqtar boiynsha joǵary bilikti mamandardy daiarlaý tizimin keńeitýge múmkindik beredi dep oilaimyn. Sondyqtan aldaǵy jańa jylda sizderdi jaǵymdy ister kútip tur», - dedi Memlekettik hatshy MMÝ Qazaqstan filialynda ótken mereitoi keshinde.
Qyrymbek Kósherbaev MMÝ Qazaqstan filialynyń ujymyna zor densaýlyq, baqyt, shyǵarmashylyq tabys, bilim men ǵylymdaǵy jańa belesterdi baǵyndyrýdy jáne Qazaqstan men Reseidiń órkendeýin tiledi.
Sondai-aq, saltanatty jiyn barysynda Memlekettik hatshy M.V. Lomonosov atyndaǵy MMÝ Qazaqstan filialynyń direktory Aleksandr Sidorovichke «Qazaqstan Táýelsizdigine 30 jyl» mereitoilyq medalin tabys etti.
Aita keteiik, M. V. Lomonosov atyndaǵy MMÝ Qazaqstan filialy QR Tuńǵysh Prezidenti - Elbasy Nursultan Nazarbaevtyń bastamasymen jáne RF prezidenti Vladimir Pýtinniń qoldaýymen qurylǵan.
2000 jylǵy 9 qazanda Resei Federatsiiasynyń Prezidenti V.V. Pýtinniń Qazaqstan Respýblikasyna jasaǵan memlekettik saparynda MMÝ rektory, akademik V.A. Sadovnichii men QR Bilim jáne ǵylym ministri Q.E.Kósherbaev Astana qalasynda L.N.Gýmilev atyndaǵy Eýraziialyq ulttyq ýniversitettiń bazasynda M.V. Lomonosov atyndaǵy Máskeý memlekettik ýniversitetiniń Qazaqstan filialyn qurý týraly hattamaǵa qol qoiǵan bolatyn.
