Kelesi jyly da maýsymaralyq kezeńde kartop pen sábiz baǵasy birshama kóteriledi. Bul týraly aýyl sharýashylyǵy ministrligi ósimdik sharýashylyǵy ónimderin óndirý jáne qaita óńdeý departamentiniń direktory Azat Sultanov aitty, dep habarlaidy Sputnik Qazaqstan.
"Maýsymaralyq kezeńde baǵa ósedi. Ondai jaǵdai jyl saiyn tirkelip turady. Biraq kartop jáne basqa da kókónisterdiń qory jasalady, onyń baǵasy qoljetimdi bolady. Kartop 200-250 teńge, al sábiz 30-40 teńgege joǵary bolatyn shyǵar. Biraq kókónistiń qajetti qory qazirden bastap jasalsa, sosyn onyń bári sharýalardyń qoimalarynda saqtalsa ǵana baǵa sondai bolýy kerek", - dedi Sultanov ortalyq kommýnikatsiialar qyzmetinde ótken onlain brifingte.
Onyń aitýynsha, búginde kartop ósiretin sharýalardyń ózderi osy kókónistiń mamyr aiyna deiin jetetin qoryn jasap qoiýdy usynyp otyr. Sonda kelesi jyly kartoptyń baǵasy turaqty bolady.
"Qazir ákimdik tarapynan tiisti jumystar qolǵa alynýy qajet. Kartopty turaqtandyrý qoryna satyp alyp, ony ósiretin sharýalarmen aldyn ala kelisimshart rásimdeýi tiis. Biz óz tarapymyzdan barlyq jumysty jasadyq. Ákimdikterge kartop ósirýshilerdiń tizimin berdik. Negizgi oblystar – Pavlodar, Qaraǵandy, Aqmola men Soltústik Qazaqstan. Qazir kartoptyń qajetti qoryn jasap alsa, kelesi jyly baǵa kúrt kóterilmeidi. Artynan mamyr aiynda ózbektiń kartoby da keledi. Sondyqtan baǵany ustap turýǵa múmkindik bar", - dep atap ótti Sultanov.
Aita keteri, biyl maýsymaralyq kezeńde kartop pen sábiz baǵasy sharyqtap ketti. Kartoptyń "otany" sanalatyn Soltústik Qazaqstan oblysynda ónimniń bir kelisi 500 teńgege jetken bolatyn. SQO ákimi Qumar Aqsaqalov sharýalar óz shyǵynyn aqtaý úshin biraz ónimin syrtqa satyp jibergendikten, kartop qymbatshylyǵy týyndaǵanyn túsindirgen edi. Al keibir óńirlerde sábizdiń bir kelisi 700-800 teńgege jetken.
