QR Aýyl sharýashylyǵy ministri Erbol Qarashókeev biylǵy astyq ónimine boljamyn aitty, dep habarlaidy QazAqparat agenttigi.
«Shynynda da, biyl astyq ónimderiniń túsimi ótken jylmen salystyrǵanda tómen boldy. Astyq boiynsha bizde shamamen 16 mln teńge bolady dep josparlap otyrmyz. Ónimdilik – ortasha. Jalpy ónimdilik 10 tsentner deńgeiinde baiqaldy. Biz qazir jinap otyrǵan kólemniń ishki qajettilikti óteý úshin jetkilikti bolatynyn aitqym keledi. Al ishki qajettilik - nan men azyq-túlikke arnalǵan bidai. Árine bizde tuqymdyq material retinde 2 mln tonna astyq ketedi, sondai-aq mal sharýashylyǵynda jem astyǵy qarqyndy paidalanylady. Tiisinshe, eksporttyq áleýettiń kólemi balansqa kiretin 3 mln tonna astyqty eskeredi. Bizdiń eksporttyq áleýetimiz shamamen 6,5 mln tonnany quraidy», - dedi ministr ortalyq kommýnikatsiialar qyzmetinde ótken baspasóz máslihatynda.
Onyń aitýynsha, jalpy BUU Azyq túlik jáne aýyl sharýashylyǵy uiymy orta merzimdi perspektivada azyq-túlik tobyna ósim bolady degen boljam bar.
«Ishki baǵalarǵa kelsek, astyq jáne onyń qaita óńdelgen ónimi – un eksporttyq taýar ekenin eskersek, osy ónimderge álemdik baǵalardyń koniýnktýrasyna tikelei bailanysty. Jalpy, osyǵan bailanysty baǵanyń ósýi baiqalady. Degenmen, birqatar óńirlerde ónimdiliktiń tómen bolǵanyn eskersek, tiisinshe fermerlerde de eleýli shyǵyn boldy jáne astyqtyń ózindik quny ósti. Osyǵan bailanysty astyq baǵasynyń ósýi bir jaǵynan fermerlerdiń qarjylyq jaǵdaiyna jaǵymdy áser etedi, óitkeni eksporttyq túsim esebinen kelesi jyldyń kóktemgi-dalalyq jumystaryn tabysty júrgizý úshin barlyq sharalar keshenin daiyndaý qajet», - dep túsindirdi ministr.
Sonymen birge, Qarashókeev nan baǵasynyń mańyzdy máselelerdiń biri ekenin atap ótti.
«Biz nan baǵasynyń turaqtylyǵyn qamtamasyz etý boiynsha birqatar shara qabyldap jatyrmyz. Birinshiden, nan óndiretin barlyq kásiporyndardy astyqpen, unmen qamtamasyz etý. Osy maqsatta Azyq-túlik kelisimshart korporatsiiasy memlekettik rezervterden arzandatylǵan astyqty áleýmettik nan pisirýge un tartý kásipornyna jiberýi úshin qazirgi zańnamaǵa ózgerister engizemiz. Úkimet bul máseleni turaqty baqylaýda ustap otyr. Óńirler turaqtandyrý qorlarynda nan-toqash ónimderin jasaý úshin un jinaidy. Jańa jyldan keiin bul jumysqa Azyq-túlik kelisimshart korporatsiiasy qosylady. Ózderińiz biletindei, korporatsiia forvardtyq satyp alý esebinen shamamen 680 myń tonna astyq satyp aldy, jartysynan kóbi forvardtyq satyp alý boiynsha jetkizildi», - dep túsindirdi ministr.
