Elimizdegi aýyl sharýashylyǵy alqaptarynyń sý shyǵyny tasymaldaý kezinde edáýir artyp otyr. Bul týraly Parlament Májilisiniń tóraǵasy Erlan Qoshanov málimdedi, dep habarlaidy QazAqparat.
«Aýyl sharýashylyǵy maqsatyndaǵy sýarmaly jerler negizgi sý tutynýshy bolyp sanalady. Memleket basshysynyń tapsyrmasyna sáikes Qazaqstan 2030 jylǵa deiin sýarmaly jerdiń kólemin 3 mln gektarǵa deiin jetkizýi kerek. Alaida sýarmaly eginshiliktiń odan ári damýyna irrigatsiia júieleriniń tozýy kedergi keltirip otyr. Elimizde gidrotehnikalyq qurylǵylardyń 90 paiyzynyń tehnikalyq jaǵdaiy tómen. Sol sebepti tutynýshyǵa tasymaldaý kezinde sý shyǵyny edáýir artty. Sondyqtan gidrotehnikalyq qurylǵylardy jańǵyrtý kerek», - dedi Qoshanov Májilistegi parlamenttik tyńdaý barysynda.
Sonymen qatar ol sý únemdeitin tehnologiialardy engizýdegi kemshilikterdi aitty.
«Memleket basshysy sý únemdeitin tehnologiialar engizýdi yntalandyrý, sý tutynýdy retteý úshin sý monitoringiniń avtomattandyrylǵan júiesi qajet ekenin aitqan bolatyn. Byltyr 248 myń gektar alqap sý únemdeitin tehnologiiamen jabdyqtalǵan. Bul kórsetkish jetkiliksiz ekeni túsinikti. Budan basqa, damyǵan elderdegidei sý tutyný mádenietin qalyptastyrý kerek», - dedi Qoshanov.
Munymen qosa ol sýmen qamtamasyz etý salasyndaǵy diplomatiiaǵa da toqtaldy.
«Ishki sý saiasaty kúshti bolmasa, kórshi eldermen tiimdi sý diplomatiiasyn jolǵa qoiý múmkin emes. Qazaqstan aýmaǵynyń sýmen qamtamasyz etilýi ózen aǵysy boiynsha joǵary ornalasqan kórshi memleketterdiń sý saiasatyna bailanysty. Sondyqtan transshekaralyq nysandardy birlesip paidalanýǵa, memleketaralyq sý qatynastaryn jetildirýge ekologiialyq qana emes, ulttyq qaýipsizdikti qamtamasyz etýdiń mańyzdy sharttarynyń biri retinde qaraǵan jón. Kórshi eldermen ózara tiimdi yntymaqtastyq ornatý Qazaqstannyń sý qaýipsizdigin qamtamasyz etýdegi negizgi faktor bolýy tiis», - dedi Májilis tóraǵasy.
