Foto: arbuztoday.ru
Biyl qazan aiynda 10 mektepte "Qoljetimdi internet" pilottyq jobasy iske qosyldy. Aldaǵy ýaqytta taǵy 2 000 mektep jyldamdyǵy kem degende 100 Mbit/s bolatyn internetpen qamtamasyz etiledi. Bul týraly Tsifrlyq damý, innovatsiialar jáne ǵarysh ónerkásibi ministrliginiń symsyz bailanys jobalardy damytý jáne monitoringileý basqarmasynyń basshysy Oljas Qabenov málimdedi, dep habarlaidy Sputnik Qazaqstan.
Búginde halyqaralyq elektrbailanys odaǵynyń naqty usynystary bar. Onda bilim mekemeleri úshin jeliniń joǵary jáne tómengi kórsetkishteri belgilengen. Ákimdikter mektepterdegi internettiń jyldamdyǵy soǵan qanshalyqty sai keletinin tekserip shyqty.
"Máselen, mektepte oqýshylardyń sany 400 adamǵa deiin bolsa, onda internettiń eń tómengi jyldamdyǵy sekýndyna 20 Mbit bolýy kerek. Degenmen barlyq mektepte jeliniń jyldamdyǵy kem degende sekýndyna 100 Mbit bolǵany durys. Tsifrlyq damý ministrligi de buny eń tómengi kórsetkish retinde anyqtady. Dál osy talapqa sai kelmeitin mektepter bar. Olardyń sany – 2 000", - dedi Qabenov búgingi brifingte.
Aldaǵy ýaqytta sol mektepter de "Qoljetimdi internet" jobasy aiasynda joǵary jyldamdyqty internetpen qamtamasyz etiledi.
"Ázirge 10 mektepte qazan aiynda "Qoljetimdi internet" ulttyq jobasy aiasynda pilottyq rejimde jyldam internet qosyldy. Biz tehnikalyq máselelerdi anyqtap, zań normalaryn tekserip shyǵamyz. Pilottyq joba jeltoqsan aiynyń sońyna qarai iske asyrylady, bári tegin bolady", - dep atap kórsetti basqarma basshysy.
Al "Qoljetimdi internet" ulttyq jobasyn iske asyrý merzimi – 2024-2027 jyldar aralyǵy. Oǵan 1,5 trillion teńge jumsalady. Onyń basym bóligi – jekemenshik qarjy. Investorlar tarifpen óz shyǵyndaryn qaitarady.
"Operatorlar óz aqshasyna ornatady. Sosyn málimetterdi óńdeý ortalyqtarynyń qurylysy kezinde jekemenshik investorlardyń qarjysy tartylady", - deidi Qabenov.
