Aýyl ákimin sailaý ideiasyn devalvatsiiaǵa ushyratyp almaýymyz kerek. Bul týraly QR Parlamenti Májilisiniń depýtaty Aidos Sarym aitty, dep habarlaidy QazAqparat.
«Taǵaiyndalǵan ákim men sailanǵan ákimniń arasy jer men kóktei. Taǵaiyndalatyn ákimdi aýdan ákiminiń usynysymen máslihat bekite salady. Iaǵni, onyń sailanýyna 14-15 adam sep boldy degen sóz. Al sailanǵan ákim eńseli júredi. Jalpy osy oraida eki máseleni qamtamasyz etken jón siiaqty. Birinshi - zańnamada durys adamdardyń sailanýyna múmkindik berý. Ekinshi – qarapaiym adamnan ákimge ainalǵan tulǵalarǵa biýdjettik qatynastar, memlekettik satyp alýlar, salyq máselelerine qatysty seminarlar ótkizý», - dedi Májilis depýtaty Sybailas jemqorlyqqa qarsy is-qimyl agenttiginiń baspasóz qyzmeti alańynda ótken brifingide.
Onyń atap ótýinshe, aýyl, aýdan, oblys ákimderin sailaý óte úlken ideia, halyq pen biliktiń arasyn jamaityn úlken dúnie sanalady.
«Sol ideiany devalvatsiiaǵa ushyratyp almaýymyz kerek. Mysaly, erteń ákimder sailanǵannan keiin qolynda dym joq bolsa, 1-2 jyl júredi de, ótinishin jazyp tastap kete beredi. Taǵy sailaidy, basqa keledi nemese halyqtyń ózi alǵashqy kezde popýlisterge, ekinshi kezekte týǵan-týysyna, rýlasyna daýys beredi. Sóitip, aýyldyń tynys-tirshiligi buryǵydan beter nasharlap ketetin bolsa, onda ideia joqqa shyqty degen sóz. Iaǵni, qoǵam tarapynan da, sailaýǵa qatysatyn partiialar men belsendi toptardyń da jaýapkershiligi qajet», - dedi Aidos Sarym.
Májilis depýtaty eldi mekenderde aýyldyq keńesterdi qaita jańǵyrtý qajettigin aitady.
«Aýdan ákimi qabyldaǵan sheshimderdi aýyldyq keńestiń 5-7 adamy bekitip otyrsa - durys bolar edi. Sonda aýyl ákimi «sheshimim negizdelgen, qoǵamnyń talqysynan ótken, ókiletti organ bekitip bergen» dep qoryqpai jumys isteitin edi. Al qazir ákimdi búkil halyqpen jalǵyz qaldyrý nemese búkil biýrokratiialyq mashinaǵa qarsy qoiý - qiianat bolar. Aýyl ákimderin sailaý tarihi, saiasi úlken mańyzy bar, Qazaqstandaǵy ózin-ózi basqarý júiesin damytýǵa úles qosar dúnie deitin bolsaq, onda oǵan jan-jaqtan tireý bolyp, kómektesýimiz qajet», - dedi ol.
