Aýyl ákimi halyqtyń kóńilinen shyǵýy úshin jumys isteýi tiis. Bul týraly Májilis depýtaty Berik Ábdiǵaliuly aitty, dep habarlaidy QazAqparat.
«Elimizde úlken naýqan ótip, 800-ge jýyq aýyldyń ákimi sailandy. Bul bastamasy ǵana. Jyl saiyn ákimderiniń qyzmet merzimi aiaqtalǵan aýyldarda sailaý ótedi. Osy joly halyq sailaýǵa belsendi qatysty. Degenmen, áli de aldaǵy ýaqytta belsendilik kúsheiedi dep oilaimyn. Eń aldymen halyqtyń sailaýǵa qatysýy jáne úmitkerlerdiń kóbeiýýin atap ótken jón. Bul óte úlken saiasi sheshim. Jalpy, áleýmettik saýalnama nátijesinde turǵyndardyń 30 paiyzy aýyldyń bolsyn, qalanyń ne aýdannyń bolsyn ákimine kóńili tolmasa, onda olardyń qyzmetine sai keletindigin qaita qarastyrý kerek. Ákimder halyqtyń kóńilinen shyǵýy úshin jumys isteýi tiis», - dedi Májilis depýtaty «Joldaý 2021: iske asyrý joldary» taqyrybyna arnalǵan dóńgelek ústel otyrysy barysynda
Onyń atap ótýinshe, aýyl ákimderi jergilikti jerde mal jaiylymy, aýyl kóshelerin jóndeý, tazalyq syndy máselelerdi sheshýi qajet.
«Ákim aýyl turǵyndarynyń múddesin aýdan ákiminiń , aýdandyq máslihat aldynda qorǵai bilýi kerek. Aýylda oryn alǵan daý-damaidy da, janjaldy da sheshe alatyn, turǵyndardy uiystyra biletin kóshbasshysy bolýy tiis. Sonymen qatar biýdjetten jáne biýdjetten tys investitsiia tarta bilýi tiis. Qai aýylǵa kóp qarjy quiylyp jatsa, onda sol aýyldyń ákimi belsendi degen sóz. Onyń jumysyn da jaqsy baǵalaýǵa bolady», - dedi Berik Ábiǵaliuly.
