Marat Ospanov atyndaǵy Batys Qazaqstan meditsina ýniversiteti qoǵamdyq-gýmanitarlyq pánder kafedrasynyń meńgerýshisi, oblystyq qoǵamdyq keńes múshesi Altai Taijanov aýyl ákimin sailaý, jańa reforma jóninde óz pikirin bildirdi, dep habarlaidy QazAqparat.
Filosofiia ǵylymdarynyń doktory, professor Altai Taijanov aýyl ákimin sailaý aýyl ómirine ózgerister ákeledi dep esepteidi.
«Bul halyqtyń úni, tilegi, tipti talaby dep aitsaq bolady. Ákimder Prezidenttiń jergilikti jerdegi ókili ekeni belgili. «Tómengi býynnan bastap joǵary qarai júrý qajet. Áitpese, qiyndyq, qatelik bolar» degen oimen áýeli aýyl ákimderinen bastap sailaý qolǵa alyndy. Ári qarai joǵarylai berýi múmkin. Jeke pikirim: jalpy ákimderdi halyqtyń sailap qoiýy durys. Sebebi bireýdi bireý taǵaiyndap qoiatyn bolsa, ol sol adamǵa táýeldi. Halyq sailap qoiatyn bolsa, ol halyqtyń atynan sóilei alady. Halyqqa eshkim táýeldi emes, halyqqa qyzmet etesiń. Máseleniń mán-mańyzy osynda. Ásirese el arasyndaǵy túrli pikir, oidyń erkin aitylýy, áleýmettik jelidegi jazba, bilik pen halyq arasyndaǵy alshaqtyq bilingen kezde munyń máni zor dep esepteimin. Bul halyqtyń oianýy. Ákimdi halyq sailasa, halyq arasynda júretin bolsa, ol oianǵan, halyqpen úndese, pikirlerin tyńdai júrip, oianǵysy kelip júrgen halyqqa qyzmet ete alady», - dedi ol.
Aýyl ákimine úmitkerler óz baǵdarlamalarynda áleýmettik máseleler sheshimin usyndy. Altai Taijanovtyń aitýynsha, muny jetkizý, iske asyrý kez kelgenniń qolynan kelmeidi.
«Alýan-alýan júirik bar, áline qarai shabady. Aýyl, tipti aýdan ákimi ózi jol sala almaidy. Ol úshin biýdjetten qarjy qarastyrylýy kerek. Al qarjy bólý úshin sol mekenniń aqsap turǵan tusyn, naqty túsindirip, aitý kerek. Oblys ákimi qoldap, máslihatta bekitilýi tiis. Aýyldan sailanǵan, halyq tańdaǵan adam is qylam dese joǵary otyrǵandar qoldaidy dep esepteimin. Al ony taǵaiyndaityn bolsa, «ornyńa basqa adamdy qoiamyn, úndemei otyr» dep aitýy múmkin. Halyq sailaǵan adamnyń artynda halyq bar. Jaltaqtamai, óz bilimi men biligin osy salada paidalana alady»,- dedi Marat Ospanov atyndaǵy Batys Qazaqstan meditsina ýniversiteti qoǵamdyq-gýmanitarlyq pánder kafedrasynyń meńgerýshisi, oblystyq qoǵamdyq keńes múshesi Altai Taijanov.
Onyń aitýynsha, sailaýdyń ádiletti ótýin qamtamasyz etý qajet. Durys, isker azamat aýyldy órge súireidi. Durys tańdaý aýyl turǵyndarynyń sanalylyǵyn, biliktiligi men parasattylyǵyn kórsetedi.
«Bireýdiń joǵalǵan tailaǵyn bireý óleń aityp júrip izdeidi»,- degen bar. Meniń oiymsha, ákim sol aýyldan shyqqan adam bolýy kerek. Bálkim ol qalada turyp, aýylǵa ákim bolǵan soń kóship baryp, sol jerde úlken is tyndyrýy múmkin. Mundai adamdardy quptaimyn. Al aýyl ákimi qyzmetin tramplin retinde qoldanyp, joǵary qyzmetterge kóterilýdi kózdese, burys. Qaladan aýylǵa barsa, kórgen, bilgen, úirengenin aýyldastaryna arnasa, odan artyǵy joq bolar edi, eldiń mádeni-rýhani jańǵyrýyna da úles qosar edi», - dedi Altai Taijanov.
